عشان انت مصرى (كلمات احمد فؤاد نجم)

احمد فؤاد نجم من اعظم الشخصيات فى مصر

وانا جيبلكم كلمات اعجبتنى وبصراحه كلامه واقع جدا





عشان انت مصرى... لازم تعانى

وتفقد كرامتك بكل المعانى

وتحرق فى دمك سنين مش ثوانى

واوعى تصدق كلام الأغانى

بتاع الحضارة وكانى ومانى

ده كله هجايص مايدخل ودانى

عشان انت مصرى العذاب بيناديك

بتبدأ فى يومك حاجات بترازيك

فى نومك فى قومك تعكنن عليك

تضايقك ولسه العماص فى عينيك

مافيش مية تشطف صابونة فى إيديك

وجسمك ملزق وريحتك عاديك

فتلبس وتنزل وفيك اللى فيك

ورايح لشغلك حتحتاج مواصلة

أدى المترو واقف وكهربته فاصلة

وفى الميكروباص خناقة وحاصلة

أوتوبيس فرامله عايزالها وصلة

وتوك توك ده تايه ومحتاج لبوصلة

بتوصل لشغلك بدم اتحرق

فى زحمة وكتمة وحر وعرق

رئيسك سايبلك كومة ورق

ده غير دمغة ضايعة وملف اتسرق

وفيه كام مواطن عامللك قلق

بيشكى تقول له روح اندعق

وعركة وهوجة وشاى اندلق

ومخك خلاص م الصداع اتفلق

هترجع لبيتك ده لو كان فى بيت

هتوصل هتندم ياريتك ماجيت

مراتك بتصرخ خلاص استويت

عيالك بتطلب وهات كيت وكيت

تزعق تِهاتى ياناس اتهريت

ولا حد سامعك مهما هاتيت

عشان انت مصرى وده للاسف

فلازم تقاسى تعيش تتقرف

وكل الأساسى فى حياتك ترف

فتنسى الكرامة وتنسى الشرف

وتسرق وتنصب أو تنحرَف

ودمعك بيجرى وجرحك نزف

مش انت اللى مصرى؟؟؟

جتك ميت قرف

ليه ياعم انت مغمئه اوي
هو يعني بس مش للدرجه
دالو كانت كده كان الواحد انتحر من زمان
بس بجد جميله ياشرف شكرا علي المجهود الرائع

لقد عرفت من اين ياكل الكتف
الله ينورنا
واحنا بقى معانا ربنا

احمد فؤاد نجم شاعر قديم مخضرم يعني عاصر مصر من ايام الملك لحد ايام مبارك وربنا يديله طولت العمر
راجل بسيط بيعيش في الأحياء الشعبية لامس ظروف الناس واحوالها وبيحب مصر جدااااااااااااااااااااااااااااااااااااااااااااااااااااا
وانا شخصيا من عشاقه