علاقة حسن ومرقص..............اية رايك ؟؟؟

انا كان لى زمان فى مارينا صديق مسيحى
كان موظف فى شؤون الموظفين اسمه ملاك
وكانت علاقتى بيه رائعة ومثالية

وطبعا فكرة الفيلم جميلة وتدعوا للتآخى

بالنسبة للفيلم شكله جامد اوى اوى
بالنسبة لموضوع الصداقة بين المسلم والمسيحى هل هى موجودة ولا لا ؟ انا شايف انها موجودة
بالنسبة ليه على المستوى الشخصى انا بالفعل اتعاملت مع اخوة مسيحين زى ما انت عارف يا احمد ، بيتر وماجد ، والحق يتقال انا ماحبتهمش ومحدش فيهم بيوحشنى ولا بيخطر على بالى وهو بعيد ، لكن ده مش علشان هما مسيحين خالص ، يمكن لانى ماقربتش منهم بالدرجة الكافية انهمي أثروا فيه بموقف معين افتكرهم لو اتقرر قدامى.


بالنسبة للمثال الحى فا انا اعرف مثال حى بالفعل :
انا كان ليه جد - الله يرحمة - اسمه فتحى عم بابا كان قاعد فى مصر الجديدة فى ميدان روكسى وعنده محل مكوة ، وقصادة واحد اسمه عمى صبحى (مسيحى ) عنده محل كبير بيفصل بدل ، الاتنين كانوا اكثر من اخوات واسرهم كانوا يعتبروا اسرة واحده ، حبوا بعض جدا جدا جدا اكتر من الاخوات ، لدرجة ان لما مرات جدى الله يرحمها تعبت فى ايامها الاخيرة كان عمى صبحى قافل محلة خالص وقاعد مع جدى فتحى فى المستشفى ليل ونهار رغم انه عنده السكر وبيتعب جدا من المستشفيات وريحتها الا انه ماسابهوش خالص ، لحد ما توفت ، وبعدها بفترة جدى فتحى كمان اتوفى ، انا كنت عارف شكل عمى صبحى ده ، راجل جسمه مليان وطويل وشه مدور ومحمر شوية وصوته جهور وبيحب طول قاعدته يقول النكت ، وعمره فى حياته ما جه فى صف حد غير جدى فتحى ده ولو حتى بهزار ، حتى فى لعب الكوتشينة مكنش يلعب غير معاه فى فريقه مايلعبش ضده ابدا وعمره ما انتقده فى حاجة ابدا بجد كان بيحبوا بعض اوى
وسبحان الله لما مات جدى فتحى لقيته فى الدفنه ، عنية مش بتقفل ومش بتبطل دموع ، عيط اكتر من اولادة بمراحل ، ومسك فى النعش بتاعه طول الدفنه شايله ومش عايز يبدل مع اى حد خالص ، كان بيعيط اكنه عيل صغير وامه ماتت وملوش حد غيرها فى الدنيا ، ولما جينا نشيله من النعش امام القبر كان بيبص له وبيعيط بدموع ماشفتش حد بيعيط زى كده فى حياتى ،لدرجة ان ابن جدى فتحى الكبير كان بيطيب خاطر عمى صبحى وقاعد يصبره ، سبحان الله المفروض انه ابن الميت الناس تصبره الا انه من شدة حزن عمى صبحى ابن المتوفى هو اللى كان قاعد حاضنة وبيطبط عليه .
واخر مرة قابلت فيها عمى صبحى ده فى ذكرى الوفاة اللى فاتت ، ومعرفتوش لما شوفته ، وشه اسود وبقى رفيع وقصر ومبقاش يقدر يتكلم ولا يضحك زى ما كان بيضحك الاول ، وهو الوحيد فى اللى كانوا موجودين كلهم اللى عيط تانى فى ذكرى الوفاة.
ولما سألت عمى عاطف - الابن الاكبر لجدى فتحى- عن احوال عمى صبحى قالى انه منزلش المحل بتاعه اللى فى مدينة نصر من ساعة الوفاة ، غير مرة واحده بس ولما راح قعد مكان جدى فتحى لما كان بيقعد وقعد يعيط لحد ما اغمى عليه ومن ساعتها حلف ماهايدخل الشارع ده تانى ، وبالفعل لحد دالوقتى مارحش المحل.

حكاية غريبة لكن انا شاهدتها قدام عنية.
واسف على الاطالة.

شكرا يا كابتن هانى
وبجد قصة جميلة ومؤثرة

قــــــال تعالى :

{ لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم إن الله يحب المقسطين }

............

شكراً Real World ATC على الموضوع

عن نفسى لااهوى ان يكون لى صديق مسيحى
انا اتعاملت معاهم كتير ولكن زى ماقال الكابتن هانى مالهومش موقف مؤثر معايا يخلينى افضل ان يكون ليا صديق مسيحى

السلام عليكم ورحمة الله ...
شكرا يا احمد على الموضوع الشيق الممتع ده لكن بصراحة الاعلام بتاعنا هو السبب فى اللى احنا فيه وهو كمان اللى مشعلل التوتر بين المسلمين والمسيحين زمان الناس كانت عايشا بطبيعتها لكن دلوقتى من كتر الكلام عن المسلمين والمسيحين الناس كرهت بعضها اكتر ثم كل ايه كل فيلم يتكلم عن الارهاب يجيبوها علينا مع انهم ما بيشوفوش الارهاب الحقيقى اللى فى فلسطين ثم مين عادل امام اللى احنا نتفرج عليه ده انا عن نفسى ما احبش اسمعله بسبب افلامه النص كم ...
اما بالنسبة للكابتن هانى بخصوص ماجد وبيتر فهو فعلا انت ما قربتش منهم زى ما انا قربت منهم فى الاسبوعين اللى فاتو ..
وبس
.....................