لحن الشعوب

شد الوتر ويلا قوم
نعزف سوا لحن الشعوب
دي الشمس طلعت
ولسة بدري ع الغروب
مين قال إن النيل
اللي عمره ما كان بخيل
مهما قل فيضانه
أو هدى جريانه
هيضل عنوانه
أو هيجف شريانه
ولا عمره يطرح
شباب أصيل
شباب يقول للظلم لأ
دي أمي دي بلدي
أنا ليا فيها ألف حق
لملمت طرف جلبيتي
ومسكته بسناني
طاقيتي على راسي
وسبت بستاني
وجيتك يا أمي
يا أغلى أوطاني
لاجل اقول للتاريخ
إني فديتك بدمي
وخدتك بأحضاني
ومن خيوط الغزل
غزلتلك أحلى نول
رسمت فيه علمك
وقلت فيه أحلى قول
كتبت فيه اسمك
وقلت مهما بعدي يطول
ياأمايا أنا راجع
أنا الشهيد الحي
مقتول بإيد أهلك
لمحت بعيوني الضي
ملعون أبو جهلك
ولا شفت ليكي زي
ولا فيه بلاد شكلك
ياأمايا أنا راجع
في منامك أندهلك
راح أموت عشان ترجعي
للي يستاهلك
وان طال بينا الظلام
للنور هتظهر دروب
والشمس أهي طلعت
وبدري لسة ع الغروب
بينا نشد الوتر
ونعزف سوا لحن الشعوب