دردشة

تعرف إن في صفات معينة في شخصيتك ممكن تساعدك في اختيارك لكلية أو شغل يريحك؟
يعني إيه؟
في شغلانات بتنفع مع ناس بمواصفات معينة.. مثلاً.. ينفع يبقى فيه دكتورة جراحة بتزهق بسرعة ومعندهاش صبر عالشغل اللي فيه تفاصيل كتير؟ ينفع مرشد سياحي مش بيرتاح مع الناس وبيتضايق من الدوشة؟
ده معناه إن إحنا لازم ناخد في اعتبارنا مهاراتنا الطبيعية ومواصفات شخصيتنا لما نيجي نختار شغل معين.
أقوللك على حاجة كمان..
مثلاً من الحاجات اللي ممكن تبص عليها في نفسك: بتحب تسمع اكثر ما بتحب تتكلم؟ بتحب النظام وبتتجنب المشاكل؟ لو كده ممكن تشتغل دكتور نفساني أو كاتب أو باحث. لكن لو انتا بتحب تبقى في وسط الناس وانتا مش بتحب تزعل حد وبتاخذ قراراتك بسهولة، يبقى ممكن تشتغل شغلانة في المبيعات، أو تبقى مدرس أو حتى تفتحلك محل.
الفكرة الأساسية هى إنك فعلاً لازم تحاول تفهم نفسك أكتر.. وتعرف إيه مميزاتك.. اسأل اصحابك وأهلك ممكن يقولولك حاجات انت مش واخد بالك منها. المهم انك فى الآخر تبقى عارف نفسك كويس قوي وتعرف ممكن تنجح فى إيه ومتنجحش في إيه.