وقف للايتام

طبعا احنا عارفين ان فيه مشروع للأيتام بدملو
وموجودة برضة جمعية الاصلاح الاسلامية
وبلاحظ ان المشروع ناجح
لكن انا بطلب من اعضاء كلام مصاطب
وولاد دملو الاوفياء
انهم يحاولوا معايا ان احنا نجد مشروع وقف للايتام
بمعنى ان الفلوس الى بتتجمع وتخرج للايتام كل شهر
نستقطع منها جزء ونحاول نعمل بيه مشروع ويكون دخلة الشهرى للايتام ويكبر ويكبردخل الايتام معاه
وبرده يكون فاتح بيوت ناس ثانية بتاكل منه عيش
محتاجين افكار لمشاريع
وبأى فلوس كتيرة او صغيرة او متوسطة
بارك الله فيكم

بارك الله فيك يا بشمهندس على الفكرة العظيمة دي .
وأعتقد مش هنلاقي أحسن من صاحب الفكرة عشان يقترح المشروع .
وأنا واثق إنك هتلاقي من أهل البلد الكتير اللي يدعمه مثل هذه المشاريع الخيرية .
بس ممكن الناس دي ما بتتابعشي المنتدي فاحنا نفكر ازاي نوصلهم الفكرة بطريقة ثانية .

سدد الله خطاك ،

بارك الله فيك فكرة رائعة

اين الافكار
محتاجين افكار لمشاؤيع يا ابناء دملو

السلام عليكم
انا مش فاهم..
يعنى حضرتك معاك فلوس وعايزنا نبحث عن المشروع.
ام انك عايزنا نجمع فلوس للمشروع.
ولو الفلوس من جمعية الاصلاح الاسلامى مستقطعة من حساب الايتام .
المبلغ كم؟

بارك اللة فيك يا باشمهنس
انا ذكرت الفكرة دي وانت قلت لي ان هناك جمعية اصلاح في دملو
وانا كان قصدي نكون بجانب الجمعية
الفكرة جميلة ومحتاجين لجدية
0اللذين ينفقون اموالهم بالليل والنهار سرا وعلانية 0
فليس هناك مانع ان نعلن
اولا من يجمع المال
ثانيا تحديد المبلغ المطوب كبداية
ثالثا اعلان اسماء المتبرعين من قبل امين الصندوق في المنتدي كحافز لباقي الاعضاء وليس كدعاية
رابعا ان لا نترك هذا الموضوع ونعجل بالبداية لكي يكون هناك شيء جاد وحقيقي في المنتدي

كل ده كويس
لكن الخطوة الاولى هى الاتفاق على نوع المشروع
ببساطة يا ابوفاطمة
الناس بتدفع كل شهر فلوس للايتام
وممكن واحد يزود وواحد ينقص وواحد ظروفة متساعدهوش
وهكذا
ايه المانع ان اللى بيدفع للايتام كل شهر يستقطع من الفلوس دى مثلا 20%
ونجمعها والدملويين اللى فى الخارج يبحبحوها شوية وندفع الجزء الاكبر
ونعمل مشروع مثلا علشان نبسط الفكرة وتبقى مقبولة
نفتح مثلا مثلا بقالة
نؤجر دكان
ونشترى بضاعة
ونجيب واحد ابن حلال يسترزق بالحلال
وياخذ اجرته ويفتح بيت
والمكسب تجعل منه جزء لتطوير المحل
وجزء لشراء بضاعة جديدة
وجزء لرعاية الايتام
يبقى معروف ان ده مشروع بيصرف على نفسة وعلى الايتام وفاتح بيت وممكن يكبر ونفتح غيرة
وبالطريقة دى يبقى ده اسمه وقف للايتام

حقهم ومحدش يقدر يستولى عليه
وممكن بدل ما نؤجر محل نشترى محل
نشترى بيت
ومشوار الالف ميل يبدأ بخطوة

الان مطلوب افكار لمشاريع وتكلفتها
تمام يا ابوفاطمة

هذه هى البداية
وهذا ما قصدته تماما

فكرة أخرى
أن نوفر لهم الامكانيات من (فلوس ومعلومات )لعمل مشروع مثل
صناعة الصابون السائل.... والجامد...ودى سلعة جميع الناس فالبلد بتحتاجها

أنا مع رأي المهندس أبو دسوقي مع احترامي لأبو عمر
الفكرة الأولى هتكون زي الشركة اللي فيها 100 شريك .
وال100 هيفضلوا 100 زي ما هم مش هينقصثوا بل ممكن يزيدوا
إنما في الفكرة الثانية او واحد شق طريقه بنفسه وسدد السلفة اللي واخدها بانتظام
يبقى كده قضينا الغرض وهو كسب قوته واحنا بننقص العدد .

والله أعلم