البنت مش زي الولد

قالت الفيلسوفة والحكيمة " سعاد حسني " في أغنيتها الشهيرة "البنت زي الولد ماهش كمالة عدد " .. ومن بعدها بقي عليه العوض في الولاد والبنات هاجوا في الدنيا وبقينا مش ملاحقين علي طلباتهم .. ولكن لي رأي أرجو مناقشته بالعقل ...فالبنت مش زي الولد ولا حاجة وتعالوا وأنا اثبتلكم كلامي وانتم اللي هتقولوا إذا كان كلامي صح ولا لأ : -
1- يقول المثل ( الواد لخاله والبنت لعمتها ) ولو البنت بقت زي الولد وطلعت شبه خالها تبقي مصيبة سودا
2- يقول المثل (أعز الولد... ولد الولد ) ومحدش قال (أعز البنت .. بنت البنت )
3- تتم معاقبة الولد الذي يعاكس بنت في الشارع بأن تقول له ( إنت معندكش إخوات بنات )ولا يتم معاقبة البنات التي تعاكس الولاد أصلا
4- الولد لو راح يصلح عربيته عند الميكانيكي هيقعد علي كرسي ويشرب شاي لكن البنت ..
5- الولد لو رايح رحلة 5 أيام كل اللي هيحتاجه 2بنطلون جينز و2 تي شيرت وفرشة شعر وعلبة جيل وفوطة لكن البنت لو رايحة نفس الرحلة هتاخد شنطتين سفر من بتوع الكويت
6- الولد يقدر يقلع جزمته في الشارع ويديها لبتاع الورنيش يلمعها لكن البنت مستحيل
7- الولد ممكن يفك الأنبوبة بتاع البوتجاز وينزل يغيرها لكن البنت أقصي حاجة تعملها تزعق وتقول " الأنبوبة خلصت "
8- لو فيه موسيقي شغالة وفيه ولد وبنت قاعدين صعب قوي تلاقي حد يقول للولد " قوم ارقص شوية "
9- لو الدنيا حر الولد ممكن يحلق شعره بالموس وتبقي موضة لكن البنت ؟؟؟؟؟؟
10- الولد ممكن يروح يتفرج علي الماتش في الاستاد لوحده أو مع أصحابه لكن البنت لازم تروح مع أخوها أو جوزها ولا يمكن تقعد في الدرجة التالتة
11- الولد مش لازم يشيل شنطة وهوه رايح أي مشوار
12- لو فيه بنت واقفة في الاتوبيس أو المترو الولد بيقوم علشان يقعدها لكن عمرنا ما شفنا بنت بتقوم علشان ولد يقعد
12-البنت لو حطيت مكياج تبقي جميلة لكن الولد لو حط مكياج يبقي بلياتشو
13- لو فيه لمبة اتحرقت في البيت والأب محتاج يشرب شاي مش ممكن يقول للولد قوم اعملي شاي ويقول للبنت روحي اشتري لمبة مسمار
14- لو البنت قعدت علي الكمبيوتر بتاع المدرسة والكمبيوتر فرقع واتحرق هتلاقي كل المدرسين بيطبطبوا عليها علشان متعيطش لكن الولد عمل كده يبقي يوم أهله اسود
15- لو البنت زي الولد "كنت ابقي شبه بنت خالتي " ونانسي عجرم شبه عصام الحضري والهام شاهين شبه يوسف داود
16- لو البنت زي الولد ماكنوش عملوا في البطاقة خانه اسمها النوع


شوفتوا بقي.... بالذمة مش سعاد حسني غلطانة ؟؟؟ ولا إيه؟؟

كلامك جميل وانا اوافقك الرأى انهم مش زى بعض
وكل ميسر لما خلق لة

اية الكلام الجامد دة
مع ان بردة طباع البنات اتغيرت كتير اوى
يعنى فى بنات بتروح الاستاد لحدهم عشان عارفين ان فى اولاد بردة راحين لوحدهم و...........
وحاجات تانية كتيررررررررررررررررررررررررررر
بس الموضوع حلو

بس برضه ما قولتش .. اقتنعت ؟؟ و لأ؟؟
ونفسي كمان البنات يعلقوا علي الموضوع ..
ولو عندهم رأي تاني .. يقولوا .. ويحاولوا يقنعونا

انا مقتنع مليو ن فى المية

بصراحة يا ابو ربيع مش قادر اوصفلك كمية الضحك اللى بضحكها بس انا مع الشخص القائل بان الطباع اتغيرت مش بس الطباع اتغيرت والاخلاق بل انهم بيحاولوا يقلدوا الرجالة فى كل شىء مش بيحاولوا بل عملوا كده ممكن دة خفى بعض الشىء فى البلد بس فى مصر بجد اتفرررررررررررررررررج ياسلام وبيقولوا بس ادونا فرصة واحنا هنبقى معلش هو دة راى

مش عارف الشخص دة ياهندسة اسأل كتاب الرياضيات يقول لك
ههههههههههههههههههههههههههههههههههههههه

شكرا لرأيك يا أخ حاتم ... وعلي العموم رأيك معناه إن البنت مش زي الولد
يعني بتشاركني في الرأي ...
شكرا مرة أخري لأنك أكدت كلامي

لو البنت لخالها تبقى احلى بنت ولو الواد لعمو اكيد هيبقى راجل جامد
عموما البنت بنت والولد ولد
لو البنت زى الولد يبقى مفيش جواز
لو البنت زى الولد يبقىمفيش صداع
لو البنت زى الولد تخرب الدنيا
لو البنت زى الولد مفيش توازن
الولد ولد والبنت بنت
البنت تكون سببا فى ادخال الاب الجنة او جهنم
الولد سندلابوه واما ان يكون ولد صالح يدعو لابوه بعد موته اويدعو عليه