ذات الرداء الأحمر

ذات الرداء الأحمر

صلوا على النبى عليه الصلاة والسلام

كان ياما كان فى قديم الزمان كان فيه بنت جميلة وصغيرة قدكم كدا بالضبط .

وكانت لابسة فستان أحمر . والبنت دى كان كل الناس بتحبها علشان كدة سموها

ذات الرداء الأحمر .

وكانت عايشة مع ماما وبابا . وكانت ليها جدة تسكن لوحدها فى مكان بعيد .

فى يوم من الأيام ماما قالت للبنت روحى عند جدتك زوريها ووديلها الأكل .

البنت قالت حاضر ياماما . البنت مشيت مشيت كتير قوى لأن بيت جدتها بعيد .

والطريق كان طويل . فجأة قابلها مين ؟ قابلها التعلب المكار . وسألها

وقالها : إنتى رايحة فين ياقمر ؟ حتى التعالب بتعرف تتكلم ياناس ؟

البنت الطيبة الجميلة قالت له أنا رايحة عند جدتى . وطبعا هو علشان تعلب

هى ماعرفتشى هو بيفكر فى إيه ؟

والتعلب علشان مكار مشى من طريق تانى بسرعة ووصل قبل ماتوصل البنت لبيت

جدتها وخبط على الباب ودخل البيت وأكل جدة البنت ولبس هدوم الجدة وقعد على

السرير مستنى مين ياحلوين ؟ صح مستنى البنت علشان ياكلها .

بعد كدة وصلت البنت وخبطت على الباب التعلب المكار قالها:إتفضلى ياحبيبتى

إدخلى . دخلت البنت وراحت عند جدتها الموجودة على السرير وقالت لها إزيك يا

جدتى أنا جايبالك أكل . التعلب قالها شكرا ياحبيبتى أنا جعانة قوى هاتى

الأكل أكله . البنت قربت لجدتها وقالت لها :

عينيك مالها كبيرة قوى كدة ياجدتى ؟ التعلب قالها علشان أشوفك كويس .

وأنفك كبير برضه ؟ قال التعلب علشان أشم بيه كويس .

وفمك كبير قوى وواسع ؟ التعلب قالها علشان أكلك .

وفعلا قام التعلب المكار وأكل البنت .

لاكن ماما وبابا حسوا بالخطر على البنت راحوا يجروا بسرعة على بيت الجدة .

دخلوا البيت شافوا التعلب بياكل باقى الطعام راح بابا ضربه على راسه

التعلب وقع على الأرض لاكن مامتشى .

فتح بابا بطن التعلب وطلع منها البنت الجميلة وجدتها وملأ بطن التعلب

بالطوب والحجارة وماما قامت خيطت بطن التعلب ورموه برة فى الشارع وهو

يستاهل كدة وماحدش سأل عنه تانى .

لما صحى التعلب المكار قام وقف وقال لنفسه : أنا عطشان عطشان راح قرب عند

البحر يشرب مية لاكن علشان بطنه ثقيلة من إيه ؟ لأنها مليانة بالحجارة وقع

التعلب فى البحر وغرق ومات

عقبال كل التعالب . قولوا إن شاء الله .

وعاشت البنت الجميلة مع ماما وبابا فى أمن وسلام من التعلب المكار .

وتوتة توتة خلصت الحدوتة .

يوم الاربعاء 16/4/2008
الامتحانات هتخلص ويقرؤا براحتهم
ان شاء الله

ربنا مع أصحابنا الحلوين كلهم

مع دعائنا لهم جميعا بالنجاح والتوفيق

ونحن فى إنتظاركم جميعا

وكل سنة وإنتوا طيبين

جميلة جميلة جميلة
بجد قصة جميلة وخلاص بقي
احنا اتعودنا علي القصص بتاعتك
وبقينا نستناها يا ريت ما تبطليش خالص

وبجد اسلوبك رائع والاخراج وطريقة الكتابة
جميلة جدا جدا ربنا يجازيك خير علي مجهودك

الصراحه القصه دى عرفها من وانا كنت فى المرحله الابتدائيه
بس والله العظيم جميله جدا
وزين ما إخترت

لأ

البنت

وحشتنا قوى ياعمر

عملت إيه فى الإمتحا نات إنت وأصحابنا كلهم؟

نتمنى لكم النجاح إن شاء الله

وفى إنتظار مشاركاتكم جميعا

ماشى ياعمر أفندى

طلعت براءة

ولما نتيجة الإمتحانات تظهر طمنونا عليكم

مستنى مين ياحلوين ؟

رضوه قالت
البنت
انا بعرفك علشان تعرفى هما قالولى
هى بتسألنا واحنا بنجاوب

شاطرة ياعلياء إنتى ورضوة

وإن شاء الله هاحكيلكم حواديت جميلة تانية

القصه جميله وبجد حلوه
والاحلى ان التعلب غرق فى البحر
والاحلى واحلى احساس الاب والام بان ابنتهم
فى خطر
ولويعلم الابناء مدى حب الاباء لهم
مكناش نشوف حوادث العقوق
سامحونى كلامى كبير على الاطفال
لكن هذه هى الحقيقه لابد ان نعلم ابنائنا ان الاباء يحبونهم
ويخافون عليهم
وفى المقابل لابد ان يعلم الاباء ان لاطفالهم عليهم حق
المشوره والراى من باب الصداقه بين الاب والابن والتقرب
وفى الختام القصه جميله جدا جدا