الرضا و دعاء أحمد

من طرف **سارة** الإثنين 12 مايو 2008, 7:59 pm

كان ياما كان ياسعد ياكرام ولا يحلى الكلام إلا بذكر النبى عليه الصلاة والسلام

كان فيه ماما و بابا وكان عندهم ولد صغير إسمه أحمد

كل يوم أحمد يبص فى المراية ويقول لنفسه أنا شكلى وحش أنا قصير

أنا ماعنديش شعر ناعم وأصحابى دايما يضحكوا على علشان كده أصبح مكتئب

وحزين ويخاف إنى الناس تشوفه وفضل على كده أيام كتيرة قوى

وكان كل يوم بالليل يصلى ويدعى ربنا إنه يغير شكله

لاكن تمر الايام ولا هو بقى طويل ولا شكله بقى جميل ولا شعره بقى ناعم

وفى يوم لقى كتاب عند باباه وفيه دعاء جميل عجبه الدعاء وقال لنفسه

أنا لما هاصلى بالليل هاقول الدعاء ده

وفعلا بالليل قام صلى وقعد يعيط وهو بيدعى ويطلب من ربنا

وكان أحمد عنده صاحب بيحبه قوى إسمه أدهم

أدهم لقاه قاعد حزين وبيفكر سأله قال له مالك أنا شايفك دايما حزين؟؟

أحمد قال له علشان شكلى وحش وأنا قصير وماعنديش شعر ناعم

أدهم قال له مين قال لك الكلام ده ؟قاله أنا اللى بقول لنفسى

أدهم قال له تعالى نروح نصلى الاول فى الجامع

راحوا صلوا مع بعض وأحمد طبعا كالعادة فضل يعيط ويدعى ويطلب من ربنا

وبعد ماخلصوا صلاة أدهم قال له تعالى نروح عندنا فى البيت

مين كان فى بيت أدهم ؟كانت مامته وإخواته البنات

بعد أحمد وأدهم ما أكلوا وهما قعدين أدهم سأل مامته قال لها

ماما صحيح إنى أحمد شكله وحش ؟ عارفين ياحبايبى إيه اللى حصل؟

البنات قعدت تضحك وأحمد طبعا زعل من صاحبه ليه قال كده قدام مامته وإخواته؟

ردت ماما و قالت مين قال إنى أحمد شكله وحش ؟ إحنا لسه كنا بنتكلم عليه

وبنقول إنه ولد جميل ومؤدب ودايما نحبه ييجى عندنا وبعد ماما ماخلصت كلام

عارفين أحمد عمل إيه؟؟؟

قام سجد لله ويقول يارب أحمدك وأشكرك وهو بيعيط طبعا

وإنتوا طبعا عارفين ليه أحمد بيعيط؟؟؟

علشان حس إنى ربنا إستجاب لدعاؤه وخلى الناس تحبه

وتمر بعد كده الأيام وأحمد يكبر ويبقى أطول أصحابه وشكله جميل قوى وكل اللى

يشوفه يحبه

يبقى إحنا كلنا ندعى دايما ربنا ونقول

اللهم أحببنى إلى خلقك واملأ قلبى بحبك وحب من يحبك .

اللهم أهلى وإخوانى ومن أحبهم بخير وإحسان إلى يوم الدين

ومن يحبوننى بخير وإحسان إلى يوم الدين

وإن شاء الله ربنا يستجاب دعائنا

وتوتة توتة خلصت الحدوتة حلوة ولا ملتوتة ؟؟؟

.

من طرف ahmoda الثلاثاء 13 مايو 2008, 12:28 am

ربنا يبارك فيكي فعلا
القصه دي مش للصغيرين بس دي قصه معبره ومؤثره فعلا

الرضا و دعاء أحمد

الرضا و دعاء أحمد

رد: الرضا و دعاء أحمد