ياله نألف

من طرف **omar20hatem** الإثنين 19 نوفمبر 2007, 11:15 am

ايه رأيكم لما نألف قصة طويله من تأليف كل الأعضاء

انا هبتدى وكل واحد يحط العبارة او الفكرة ونكمل واللى وراه يكمل لحد ما تبقى قصة طويله وطبعا

جميله ومشوقة من تأليف رواد موقع كتكوت دملو

وياريت نخلى الافكار اكثر تشويقا واثارة وهكذا

وطبعا اعذرونى فى حذف أو اضافة اى تعليقات

ممكن تؤثر على القصة بالسلب

فجائز التعديل والاضافة والحذف

لمصلحة القصة ونجاحها

ابتديناعلى بركة الله

من طرف **omar20hatem** الإثنين 19 نوفمبر 2007, 11:21 am

المشهد الأول

مجموعة من الشباب فى سن الجامعه

من بلد واحدة زى بلدنا دملو

وهما بيتمشوا بالليل على الجسر عجبتهم الجميزة اللى جنب مصنع الطوب

قالوا تعالوا نقعد نتسامر هنا

والقمر بدر

وفى الاجازة الصيفية

((جنب الذرة بتاع ابراهيم السكرى ))....تحذف

ياريت تقترحوا عددهم واسمائهم وتكملوا هيقولوا ايه

من طرف **mohammed** الإثنين 19 نوفمبر 2007, 12:15 pm

محمد : تصوروا ممكن نتجمع تاني بعد ما نخلص دراسة وكل واحد فينا يشتغل في مكان

مختار : ان شاء الله ما فيش حاجة هتقدر تجمعنا اقصد تفرقنا
سمير : يا عم سيبك انت اول واحد مش هتعبرنا بعد ما نخلص دراسة انا عرفك ندل
يحى : اه والله عندك حق دا احنا بنروح نجيبه من عالسرير علشان نخرج شوية ولو محدش راحلوا ما حدش بيشوف وشه صحيح ندل
مختار : ايه ياعم الحاج انت وهو انتوا هتسخنوا عليا ولا ايه لو واحد فيكم بيروح الغيط وبيعمل اللي بعمله كان روح اتخمد وما قامش دا انتوا تحمدوا ربنا اني صاحي لحد دلوقت..........
ويستطرد - صحيح انا رايح الغيط الصبح اسيبكم بقى في الجو الشاعري ده ومحدش يقطع في فروتي
محمد: هتروح لوحدك خدني معاك احسن عندي شوية شغل الصبح
مختار : تعالى سيبهم بقى ما هما دول الفاضيين واخدين السكة قياسة
ويتوجهان منصرفين تاركين سمير ويحى
تصورا بقى دول هيقولوا ايه ودول هيقولوا ايه

من طرف mokhtar الإثنين 19 نوفمبر 2007, 8:42 pm

محمد: الواحد وراه كوم شغل الصبح يلحق يناملو شويه ابويه هيصحينا قبل الشمس ما تطلع
مختار: ياعم الواحد هيروح المصالح الحكوميه بكره وانت عارف الي هنشوفو تعود طول اليوم علشان امضه من موظف وصلو لبيت لاول تصبح علي خير انا كده جبت اخري ادخل انام يكمل يروح ينام
يحي: شوفت الاندال مشيو وسبونا قاعدين ياعم كبر دماغك خلينا قاعدين كده القاعده حلوه والله عندك حق الجو انهارده روعه
سمير: انت مقولتليش هتعمل ايه بكره
يحي: ولا حاجه هصحي علي الضهر لو لقيت نفسي فايق هنزل بنها
سميرك خلاص ابقي فوت عليه يمكن اجاي معاك انا فاضي اوم نتمشي شويه
يحى :يعم اعود القاعده حلوه
سمير:علي رئيك صحيح الكلام الي قالو محمد ومختار ده ممكن يحصل هيجي يوم وننشغل كل واحد في حاجه ومش هنقدر نتجمع تاني
يحى: والله الموضوع محيرني ساعات اقول مظنش اننا هنتفرق وسعات اقول اول ما كل واحد فينا يشتغل ويتجوز ولا هنشوف بعض غير كل فين وفين
تعتقد ايه رد سمير

من طرف **سميرالسيد** الإثنين 19 نوفمبر 2007, 10:39 pm

ردسمير:لية ياعم هنشوف بعض وكل حاجةبس بدل مابنتقابل هنا عند الجميزة
هنتقابل عندى او عندك ونشرب شاى وهنبقى جالسين على انترية
والا انت مش هتجيب انترية؟؟؟
والا مراتك هتنيمك من المغرب؟؟؟؟
..............ونشوف يحي هيرد يقول اية؟؟؟........

من طرف **omar20hatem** الثلاثاء 20 نوفمبر 2007, 6:28 am

تعديل بسيط انا هحط الاسامى علشان الناس ماتتهوش
ونكمل
يعنى اللى كتبوا برده يرجعوا يقرأوا من الاول تانى لمعرفة الاسماء

من طرف **omar20hatem** الثلاثاء 20 نوفمبر 2007, 6:41 am

يحى :والله دمك عسل يابوسمره

هههههههههههه
سمير : هسسسس سامع الصوت الغريب ده

من طرف **mohammed** الثلاثاء 20 نوفمبر 2007, 12:23 pm

يحي : اه صوت رجلين جايه ناحيتنا يمكن محمد وممختار راجعييييييييييي - اااااااااااااهه

سمير : يحي يحي الواد جاله ايه انت يا بني فوق فوق فوق !!!!!
يا خبر ابيض الواد ما بيردش خالص
الحقونـــــــــــــــــــــــــــــــــا

من طرف **mohammed** الأربعاء 21 نوفمبر 2007, 10:09 am

سمير : يحي يحي اصحى بقى وقعت قلبي

يحي : آآآآآآآه مش عارف زي ما يكون حد حدفني بطوبة في راسي
سمير : وريني كدة ... مفيش حاجة يا بني ........ استنى فيه علبه مرمية هنا اهي تعالى نفتحها
يحي : لا يا عم احسن يكون فيها حاجة مش كويسة
سمير : هيكون فيها ايه يعني يلا يا ابني نفتحها .
يحي : استنى دي بتتحرك - يلقيها على الارض -
سمير : ههههههه بتتحرك اول مرة اشوف علبة بتتحرك يا ابني دي كرتونة يعني مالهاش رجلين
يحي : والله العظيم بتتحرك انت ما شفتهاش .... انا ماليش دعوة يا عم انا همشي
سمير : استنى بس يا يحي ... هي فعلا اتحركت
في الخلفية حركة اقدام تتوجه مسرعة اليهم شخص ملثم يلتقط الكرتونة من الارض ويسرع هاربا
تخيلوا بقى ايه اللي في الكرتونة ومين اللي كان ملثم

من طرف **omar20hatem** الأربعاء 21 نوفمبر 2007, 10:19 am

ماشى يامحمد كده تمام
منتظر الردود من الزوار

من طرف **mohammed** السبت 24 نوفمبر 2007, 2:08 pm

صباح اليوم التالي
محمد يصحو من نومه مبكرا كالعادة ويتوضأ ويتجه للصلاة - يسمع اصوات في الشارع _ وكانها اصوات الاسعاف , الشرطة , المطافي
لا يستطيع تمييزها _ المهم ينتهي من صلاته ويخرج مسرعا ليرى ماذا جرى ؟؟؟؟؟؟؟
محمد : فيه ايه يا استاذ على ؟
على : لا بيقولوا ان البلد كان فيها حرامية امبارح بالليل
محمد : حرامية؟ وسرقوا ايه ؟
على : لسة مش عارف انا هروح اشوف وابقى اقولك
محمد : طيب اخش انا افطر واشوف هعمل ايه
يتوجه محمد الى داخل المنزل ويلاقي والده فيساله : ايه فيه ايه يا محمد ؟
محمد : مش عارف بيقولوا فيه حرامية في البلد
ثم ينتبه فجأة
ويهمهم في سره " احسن يكون العيال يحي وسمير الشيطان وزهم وسرقوا غيط حد من اهل البلد "
فيقاطعه والده : بتقول ايه ؟
محمد : هيه لا ولا حاجة انا هفطر واروح الغيط بقى عايز مني حاجة يا والدي
الوالد : لا افطر بقى وابقى حصلني انا هسبقك علشان نفرق الحد بتاعنا مع عمك اسماعيل
محمد : حاضر يا والدي

من طرف **omar20hatem** الأحد 25 نوفمبر 2007, 10:15 am

المشهد الثانى

فى بيت عم حمدى

عم حمدى راجل مكافح ومتوسط المعيشه

موظف بسيط فى مجلس المدينه

وعنده من البنات اتنين

علياء ورضوه

علياء الكبيرة وبتدرس فى كليه التربية

السنه الاخيرة

ورضوه فى الثالث الثانوى فى مدرسة دملو المشتركة

وعنده ولد واحد عمر

شيخ المسجد البحرى

بتبدأ القصة بقاعده فى البيت القديم

مبنى بالطوب والطين

وفى الصاله على الفرشة الحصير

بتيجى أم سهام

جارتهم من طرف عريس جى يخطب علياء

وكملوا انتم الحكاية

من طرف **عبدالواحد** الأحد 25 نوفمبر 2007, 7:38 pm

الجارة:سلامو عليكوا

الاب:وعليكم السلام ورحمة الله وبركاته اتفضلى يا أم محمد الشاى يا علياء

الجارة:انشاء الله شربات

الاب ليه خير !!!1

الجارة:أصل فى عريس لعلياء I love you

الاب:مين؟؟

الجارة:ابن الحاج مصطفى أبو الشيخ أحمد

الاب:أحسن ناس بس البت لسه ما خلصتش علامها

الجارة:علام ايه هى البت ليها الا بيت جوزها

الله أكبر....الله أكبر

الاب:بالاذن أنا علشان الظهر

الجارة:يا ام علياء دا عريس لقطة

الام:لا انا مليش دعوة البت وابوه هما اللى ليهم الرأى

الجارة:دا شغال فى السعودية

الام:لا برده انا مليش دعوة

الجارة:يا علياء

وتحضر علياء:نعم ياخالة

الجارة:ايه رأيكفى الاستاذ\أحمد ابن الحاج مصطفى أبو الشيخ أحمد

علياء:شاب محترم

الجارة:اقصد كعريس ليكى

علياء:أنا مش بفكر فى الجواز دلوقتى

الام:اشربى الشاى

من طرف **omar20hatem** الإثنين 26 نوفمبر 2007, 7:18 am

المشهد التالى

علياء وأختها رضوه

فى غرفة البنات داخل البيت بتاعهم

من طرف **mohammed** الأربعاء 28 نوفمبر 2007, 12:45 pm

رضوة : ايه الاخبار؟
علياء : اخبار ايه ؟
رضوة : ما تبقيش غلسة بقى , انا عارفة ان الست اللي كانت هنا كانت جايبالك عريس
علياء : انا مش بفكر في الجواز دلوقت !!!
رضوة : عليا انا هو فيه بنت مش بتفكر في الجواز
علياء : بس مش دلوقت لسة بدري عالكلام ده
رضوة : لسة بدري ولا ..............
علياء : ولا ايه ؟ انتي هتسكتي ولا اضربك والله .
رضوة : على ايه الطيب احسن انا بس كنت عايزة اسالك
: الا اخبار محمد ايه ؟ ابن الحج حسان؟
علياء : محمد ماله ؟ ( تبدو شاردة الذهن )
ثم تنتبه فجاة ممسكة بالمخدة : انا مش قلتلك هضربك .

من طرف **mezo2010** الثلاثاء 11 ديسمبر 2007, 2:22 pm

والله والله دملو فيها ناس دماغه عليه قوي
بجد الله ينور على صاحب الفكره
هكمل معاكم الفكره بس مش المرة دي
الله ينور عليكم كلكم

من طرف **omar20hatem** السبت 05 يناير 2008, 7:49 am

تخرج رضوه من الحجرة وتنفرد علياء بنفسها متنهده
وفجأه تمسك بالموبايل وترسل رسالة إلى محمد مضمونها
أنا جايلى عريس
احمد مصطفى أحمد
أخو زميلك علي
أخوه اللى شغال فى السعودية
رد على أتصرف ازاى

من طرف **أبو سلامه** السبت 04 أكتوبر 2008, 11:47 pm

محمد قاعد لا بيه ولا عليه جاتله الرسالة كهربته . حاول يتصل لكن مفيش رصيد

بعت رسالة لرضوة ..... ( كلمنى . شكرا ... please call me )

رضوة : لقت الرسالة على التليفون قالت ... ده اللى ربنا قدرك عليه....

وطلبت محمد ............

التليفون فى ايد محمد بيرن ( تررن تررن ... تررن تررن )

محمد :- الو .. خير يا رضوة

رضوة: خليك كده سلبى على طول ، كمان حاطط كول تون . والله مانت حاسس بحاجة

محمد : - ابدا والله بس معاييش رصيد والعملية مأشفرة معايا شوية

رضوة : وأيه الحل ؟

محمد : سيبيلى الموضوع وأنا هاتصرف

حوار الاب مع زوجته

الاب

يأم علياء هو صحيح الولد ميتعيبش ابدا وكمان معاه فلوس كثير لكن البنت بتتعلم

الام

يا أبو علياء زواج البنت سترة وهيجرى ايه اما تتزوج وهتكمل وخلاص فى بيت زوجها

من طرف **A . PIDO 19** السبت 01 نوفمبر 2008, 2:16 am

ايه الدماع العليا دى
اكيد مش فكرة ابو عمر

من طرف v_e الثلاثاء 04 نوفمبر 2008, 4:28 pm

محمد يتحدث مع زميله مختار بالليل

مختار: مالك ياعم شايل طاجن ستك كده ليه
محمد: علياء
مختار :مالها؟
محمد : جالها عريس وانا مش عارف اعمل ايه؟
مختار:عريس ..........
محمد:شوفت المصيبة اقولى اعمل ايه انت عارف انى بحبها
مختار: خلاص روح اتقدم لها
محمد :مانت عارف البير وغطاه لا شقة ولا فلوس
مختار:طيب اتكلم معاها ودوروا على حل سوا اقوم كلمه دلوقتى ياله

من طرف **الحريف** الأربعاء 12 نوفمبر 2008, 1:10 am

في اليوم الثاني محمد بنتظر عليا حتى تنتهي من محاضرات اليوم في الكليه
بينما محمد مشغول باله في حل لهذه المشكله
مضى الوقت واذا عليا خرجت من قاعة المحاضره

محمد: ياعليا عليا
عليا:انته هنا ايه اللي جابك هنا
محمد:ازيك
عليا:نفوخي وجعاني من ساعة ما تقدم لي الواد بتاع السعوديه اوووووووف مش عارفة اركز
محمد:طيب نشوف مكان هادي نجلس فيه انا عزمك عالغدى
عليا:بصراحة انا ناسيه اني جيعانه
هههههههههههه
اوكي يالاه بينه
محمد :يالاه

ياللاه ياجماعي باقي القصه عليكم

من طرف **princessa_nahola** السبت 15 نوفمبر 2008, 6:24 am

وبالفعل اخد محمد عليا وراحوا مطعم متعودين ياكلوا فيه وبعد ما طلبوا الاكل واثناء اكلهم
بدأت عليا الكلام قائله : ها يا محمد وبعدين نويت تعمل ايه فى المشكله دى.........؟
محمد : والله مانا عارف بس اطمنى انا هتصرف
عليا : هتتصرف امتى بس.............. يا محمد انا عماله اتحجج بالكليه والدراسه بس وبعدين دى اخر سنه يعنى كلها كام شهر واخلص وكده مبقاش فى اى حجه
محمد: عليا حبيبتى انتى عماله تقفليها فى وشى كده ليه (وكان بضحك ببرود ولا مبالاه )
عليا (بعصبيه) : بجد انا مش عارفه انت بتتكلم بالاسلوب ده إزاى ....يالا يالا يا محمد قوم روحنى
وقامت عليا وهى فى قمه غضبها من برود محمد وسبته وروحت بيتها

وفى البيت .......دخلت عليا البيت طبعا وهى زعلانه من محمد وفى مليون حاجه عماله تدور فى دماغها ولما شافتها اختها رضوه سألتها : مالك يا عليا شكلك مش مبسوط
عليا : ونبى يا رضوه تسبينى فى حالى دلوقتى انا مش ناقصاكى
رضوه : ايه ده ايه ده ايه ده دانتى باين عليكى انك على اخرك اكيد اللى مايتسمى محمد ضايقك زى عوايده
عليا (وهى تبدأ فى البكاء): انا تعبت بجد معاه حاطط ايده فى ميه بارده ومش حاسس بالمشكله اللى انا فيها ............مش عارفه اعمل ايه
رضوه : مانا ياما قولتلك انه لعبى ومش بتاع جواز وعايز يعيش شبابه وبس وانتى كنتى تفضلى تقوليلى انى لسه صغيره ومبفهمش فى الحاجات دى ........شوفتى اهو حصل اللى كنت عمله حسابه .
عليا :يووووووه هنفضل نقول الكلمتين اللى ملهمش اى لازمه دولى حراااااام عليكى
رضوه : يا حبيبتى انا خايفه عليكى انا برضو اختك ويهمنى مصلحتك...... يا عليا لازم تفوقى من الوهم اللى عايشه فيه ده بقى ........ماله احمد اللى متقدملك ,,,,انسان محترم وابن ناس و شاريكى .....بصى لمصلحتك بقى وانسى اللى اسمه محمد ده وامسحيه من حياتك
عليا : ايه.... انسى محمد!!!!!,طيب إزاى !!!...تفتكرى هقدر انس بالسهوله دى اجمل سنتين فى عمرى .....لا لا لا قولى كلام غير ده
رضوه : انتى حره بس اسمعى كلامى وفكرى مره واتنين وعشره ....ده مستقبلك وانت حره فيه علشان مترجعيش تندمى
وقامت سابتها لوحدها فى الاوضه وخرجت .........( وهنا بدأ صراع داخل عليا بين الحبيب اللى عايز يعيش حياته و العريس اللى متقدم لها وجاهز من مجاميعه)

وانتوا بقى كملوا

من طرف **abu rabia** السبت 15 نوفمبر 2008, 7:37 pm

طالت جلسة عليا وهي ساهمة ... كانت عينها قد اغرورقت بالدمع ... حتي تكسرت اهدابها ..

واصبحت صور كل ما حولها صورا مهتزة ... حتي ضوء ذلك المصباح الذي يعلو مكتبها ..

ازاحت تلك الخصلة التي تناثرت من شعرها وغطت وجهها ... وزاغت عينها في انحاء

غرفتها .. وكأنها تبحث عن شئ مجهول ينقذها من افكارها ... لا تعرف لماذا تذكرت الان ..

جملة قرأتها في احدي كتب دراستها .. ( وأي شئ أصعب علي الانسان من ان يجد نفسه في
قارب بلا مجداف .. وسط أمواج متلاطمه وليل حالك .. فأين النجوم التي ترشده .. ؟؟؟)

وظلت تلك الكلمة تصم أذنها .. وكأن ديكنز عندما كتبها .. يصف ما تحس به وما يكتنفها من مشاعر

... بخطوات متثاقلة .. تحركت علياء في غرفتها نحو مخدعها .. تنظر الي ذلك المنبه القديم

والتي تتحرك عقاربه ببطء ورتابه .. وكأن الزمن يريد التوقف .. ليزيد من حيرتها ..ويطيل مداها

... حتي صوان ملابسها والتي تآكلت بعض حروفه وبهت لونه الاصفر .. وتلك المرآة التي

تناثرت بها نقاط معتمة ... وستارة قديمة كانت ذات يوم تحمل لونا زهريا .. كل ما حولها

يزيد من تلك الوحشة التي تشعر بها .. حتي وقع خطوات قدمها الحافية علي تلك الحصير القديمة

........ كانت عليا تتذكر كل ما تربت عليه في ذلك البيت .. تتذكر كلمات ابيها وهو يحدثهم

صغارا عن حكايته مع امها .. تتذكر تلك اللمعة التي كانت تلمحها في عينيه .. وهو يتحدث

عما عاناه حتي تزوج امهما .. تتذكر دمعات كانت تتساقط من عيني امها فتحاول مداراتها ..

عندما كان والدها يتحدث عن حبهما ..

( الحب يا ولاد اقوي من كل شئ .. اقوي من الناس
اقوي من العادات .. وخصوصا لو حب حقيقي .. حب مبني علي التفاهم والتضحية والتحمل ..
وآه لو تعرفوا ازاي أنا وأمكم واجهنا العالم كله .. واتمسكنا ببعض .. وكان حبنا سلاحنا ..
ولأننا عمرنا ما فكرنا غير في رضا ربنا .. فلابنا نصرنا وجمعنا .. وبنينا حياتنا بالصبر ..
وكفاية عليا اننا راضيين .........)

كانت تلك كلمات مما تعود والدها ان يسردها عليهم .. وهو يحكي لهم حكايته .. .

تذكرت عليا كل ذلك ... ووسط كل ما يحيط بها من ظلام .. او ما توهمت بأنه ظلام ..

ظهرت لها من بعيد ... طاقة من نور.. ولمحة من أمل ...

كانت قد جلست علي سريرها ... فتمددت في هدوء .. ووأسندت راسها علي ذراعها

لابد ان اقاتل من أجل حبي .. لابد أن اتمسك به ... فقد قاوم ابي وامي العالم .. وحاربوا من أجل
حبهم .... وانتصروا .. لابد أن أقاوم وسأرفض كل ما يحاو.......

( الحب يا ولاد اقوي من كل شئ .. اقوي من الناس
اقوي من العادات .. وخصوصا لو حب حقيقي .. حب مبني علي التفاهم والتضحية والتحمل ..)

لا تعرف لماذا قطعت تلك الجملة سيل افكارها .. ( حب مبني علي التفاهم والتضحية والتحمل )

فهل حبها لمحمد .... هو حب حقيقي ؟؟؟

اذن فهذا هو الحل ........ نعم .....

كانت عليا قد اعتدلت فجأة من علي سريرها لتهب واقفة وهي تقول تلك الجملة السابقة ..

هذا هو الحل ... لابد ان اعرف اولا هل حبنا ... حب حقيقي ؟؟ بعدها ساقف أمام العالم

وأعلنها دون خوف

من طرف باور السبت 29 نوفمبر 2008, 1:01 pm

كل سنة وانت طيب يا عمو محمد ربيع

من طرف **omar20hatem** الأربعاء 03 ديسمبر 2008, 9:50 am

باور كتب: كل سنة وانت طيب يا عمو محمد ربيع

على فكرة العضو المميز باور
هو محمد حسام
طبعا حسام أبوالعزم
طبعا أبوالعزم حسينى

ياله نألف

ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف

رد: ياله نألف