هل تصدق هذا الكلام

جربت مرة كده فى أى قعدة حلوة مع مجموعة من أصحابك أنك تفتح موضوع العفاريت ..أكيد حتلاقى كل واحد منهم عنده قصة مسخرة عن الموضوع ده ..ويمكن ده الموضوع الوحيد اللى القصص فيه مش بتنتهى .. وطول ما انت عمال تسمع قصص من اياها حتلاقى نفسك مذبهل ومبحلق عينك فى اللى بيكلمك ومش نازل عليك كلمة واحدة بس (( يا سلااااااااااااام)) .. وطبعا لو كان معاك حريم فى القعدة دى مش حتسلم من سماع الجمل المشهورة للستات من (( يا خراشي )) و(( اشتاتا اشتوت)) و (( ربنا يجعل كلامنا خفيف عليهم )).. وطبعا احلى الحكايات وأغربها فى موضوع العفاريت ده حتسمعه من الستات .
وأنا مش عارف حقيقى ليه الستات بالذات بتصدق أى قصة تتقال لهم عن العفاريت لدرجة أن واحدة غالية عليا أوى شافت حلقة فى برنامج خليجى عن واحد مستضيفينة كان له مغامرات مع العفاريت وسمعت حاجات غريبة وكانت مذهولة وجت تسألنى انت عمرك ما شفت عفريت ؟! .. قولتلها يا ختى احنا ماشفناش غير العفريت بتاع يااااااااااااااااااا مصطفى اللى طلع لــ(سماعيل يس) من الفانوس السحرى وتلاقيه طالع فارد عضلاته ويقول شبيك لبيك إمشى على دماغك وارفع لفوق رجليك .. اه وطبعا تلاقيه لازم بيضحك ، ومتعرفش هو اساسا بيضحك على ايه .. ال صحيح هو العفريت لما يطلع من الفانوس بيضحك على ايه ؟! .. ما علينا .. المهم بأه انى انا شخصيا كنت زمان وأنا صغير معلوماتي عن العفاريت كانت لا تتعدى فيلم الفانوس السحري .. إن عفريت كده يطلع من اى فانوس من فوانيس رمضان واديله الفركة التمام زى مصباح علاء الدين بالضبط .. وحطلب بأه .. يعنى مثلا يسرب لي الامتحان بتاع الابتدائية أويضربلى ناظر المدرسة كام قفاااااا ... وكده .
بعد كده مع فيلم ( الانس والجن ) لعادل إمام شفت شكل تاني باه للعفريت .. العفريت الرزل أبو دم تقيل .. يعنى العفريت بتاع الفانوس كان عفريت مسخرة .. لكن ده باه كان شكل تاني .. عفريت اخر غتاتة ..هنا باه حدث عندى تصور تاني .. مبأش بس العفريت اللى لابس نص هدوم وطالع بيتاوب من الفانوس ده فيه عفاريت كمان شغالة أذية فى خلق الله .. قولت لما اقرأ فى الموضوع ده واشوف الحكاية ايه وجبت شوية كتب إسلامية بتتكلم عن الجن والعفاريت .. وبدأت اطلع أكثر كنت يومها يمكن فى 3 اعدادي أو أولى ثانوى مش متذكر بالضبط .. بس المهم فى الحكاية انى كنت عاوز اعرف هل الحكايات اللى سمعتها والافلام اللى شفتها عن العفاريت دى حقيقى ولا لأ .. والحصيلة دى اللى حصلت عليها من المعرفة كانت حصيلة كويسة انى اقدر احكم على اى قصة اقراها هل هى تاليف وفبركة ولا ممكن تحصل .
ومن ضمن تلك القصص حكاية (( عمارة الرعب )) اللى موجودة فى الاسكندرية فى ارقى الاحياء بها وهى منطقة (( رشدي)) .. العمارة دى يا جماعة دلوقت تساوى ملايين ومع كده هى عمارة مهجورة .. وظلت العمارة دى مصدر للحكاوى من اهل الاسكندرية والاشاعات كمان .. وكان السؤال اللى بيفرض نفسه يا ترى عمارة زى دى فى ارقى احياء الاسكندرية مهجورة ليه ؟! .. طب وفين صاحبها ؟! .. وطبعا كانت الاجابة النموذجية ان العمارة دى ولا مؤاخذة مسكونة بالعفاريت .. ده مش كده وبس ده طلعت الحكاوى كمان عن سبب وجود العفاريت فى العمارة دي .. وأتذكر تحقيق صحفى قريته حول العمارة دي .. والصحفى عمل لقاءات متنوعة مع الناس المجاورين للعمارة .. اللى يقول أن العمارة كانت في الأصل مسجداً، طمع فيه رجل أعمال فهدمه وأقام بدلاً منه عمارة سكنية فسكنتها العفاريت عقاباً له على فعلته .. واللى يقول إن العفاريت سكنت هنا لأن صاحب العمارة قتل فيها بعدما بناها فسكنها عفريته.. واللى يقول ان اى حد يسكن فيها يصحى بالليل من النوم ويلاقى الاثاث بتاع الشقة مرمى فى الشارع .. يمكن واحد بس هو اللى قدم تفسير منطقى وهو وحارس عقار احد العمارات المجاورة فقال ان العملية لا عفاريت ولا بتاع الحكاية وما فيها أن صاحب العمارة دي مات بعد ما بناها على طول، وأختلف الورثة عليها وحتى اليوم مازال بينهم مشاكل .
فمسألة العمارة دي غريبة وتحيط بها التخاريف من كل جانب .. لكن برده استوقفتنى حكاية تانية قرأتها فى موقع مصراوى والكلام فيها للدكتور عبد العظيم المطعني الاستاذ بجامعة الأزهر واللى بيقول انه حصلت له حكاية غريبة فى القاهرة فبيحكى ويقول الأتي : ((كنت أعمل في الأهرام وكنت أنهي عملي هناك في وقت متأخر من الليل وكانت سيارة العمل توصلني إلى منزلي وقبل منزلي كانت توجد مكتبة تغلف الكراريس ويوجد من مخلفاتها بعض ما يسمونه الدشت ويقومون بجمع هذه القصاصات من الورق وتكويمها خارج المحل في أنتظار أن يأتي عامل النظافة في الصباح وعندما نزلت من سيارتي كنت أمام هذه المهملات فوجدت فجأة فتاة تخرج من وسط هذه القصاصات لم أتبين ملامحها ولكنها بدت على شكل فتاه عادية ولكن الحمد لله ثبتني الله وفي الحال قلت أعوذ بالله من الشيطان الرجيم فاختفت هذه الفتاة في الحال وهذا دليل على أنها ليست بفتاة من الإنس وإنما كانت من الجان ))
وأنا يا اخوانا اعتقد ان الحكاية دى عادى جدا وممكن تحصل ، يعنى حكاية ممكن نصدقها ، وفيه تجارب للحكايات دى من السنة النبوية .. لكن تلاقى هناك حكايات تانية خالص اولا ملهاش دليل من السنة وتاني حاجه تظل حكايات قاصرة على اصحابها بس ..ومن ضمن تلك الحكايات زواج الانس والجن أو الحب بينهم ..لدرجة أن مجلة (صباح الخير) طلعت بتحقيق صحفى كبير من كام اسبوع وكانت طرحه تساؤل هل زواج الانس والجن حقيقى ولا خيال .. وطبعا كانت المعارضة من كل الضيوف واضحة وصريحة .. وبرده مسالة المس فرغم معارضة علماء علم النفس لحكاية المس دى وبعتبروها حيلة نفسية إلا أن كثير من علماء الشريعة برده كان ليهم موقف مختلف من حكاية المس وبيأيدوها ..
يعنى الخلاصة يا اخوانا اللى عاوز اقوله أن كتير من قضايا الجن والعفاريت فيها خرافات كتير وللاسف الفضائيات ساهمت فى انتشار كتير من الخرافات دي ، واتذكر كانت هناك قناة على النيل سات متخصصة فى الحاجات دي وبعد كثرة الشكاوى أوقفت الحكومة المصرية مشكورة القناة المهببة دي ..فاللى عاوز اقوله انه فى ظل غياب الوعى الدينى أولا فالعقل سهل انه يقع فى كتير من الخرافات ، وفى نفس الوقت هناك حقائق عن غيبيات اثبتتها الشريعة فمش لازم نتفزلك وننكرها لان العقل لا يستوعبها ..أنا أتمنى نتعامل مع القضايا دى بشىء من الوسطية من غير انحراف وهرتله توصلنا للخرافات.. ومن غير تنطيط وفزلكة تجعلنا ننكر حقائق فيها نصوص صريحة


--------------------------------------------------------------------------------







منقول

اكيد حد كلك بخ
هههههههههههههههههههههههههههههههههه

محصلش حاجه علشان انا اللي كنت قاعد هناك جنب ماسوره الميه وكنت بصلي

لاة حصل وانا اعرف بس مش هقول
فكروا انتو الاول