الناصر صلاح الدين شعر ابو المجد حسين

أشوفك رسم في الكراريس
ولون أخضر علي الشاشة
وزُمــَّارة ورشـَّــاشـة
وشوفك من ضِـيا الفوانيس
عروسة في ليلة الحنة
وأتمني…
تكون عـيـونــك المُهْـرة
وعشقك وشـم فوق السيف
وشوفك حـبـل في الساقية
ومية تترس القواد يس
وشوفك ويَّا لمع البرق
حين أصرخ من الكوابيس
وشوفك حين أنا فارس
ونازف دمي ع المتاريـس
وشوفـك من يجف الريق
ويتبعتر صدي صوتي
علي لحمي اللي متــْبَـعـتـر
مابين المينا والمينا
وشوفك من أدِبِّ الفاس
وأبني قصر مش لينا
وشوفك لما ياخدوني
ويرموني ورا الكواليس
وأنا الناصر صلاح الدين
وأنا خـُوفـُو وأنـا رمـسـيـس
وأنا المتـْعَـبـِّي بالضلمة
ومتـْمدد علي الدَّبابـيـس
وأنا اللي إخـتـل مـيـزاني
وأنا المقــتــول والجـــاني
وأنا اللي حـُبـِّي بكـَّاني
وبكـَّي الفجـــر جوايا
علي بوابة الترحال
بشوفك ..وانت شايفاني
وعارفــاني عذابي طال
وما في حـد من بـَعـدِك
يشد عــروقي في الرقـبة
ينهـنه صوتي في الموال
ومافي حــد مــن بعـدِك
بيحـلا له الغـُني والقـــُول
أنا منـِّك مانيش من دول
وأنا ابنك أنا كــبـدك
وأنا ليلك وأنا الأرغول
وأناعلمك وأنا نصرك
وأنا صقـرك وأنا المغـلـول
وانا رغم الخطا تاهت
وغربة ساعة شهر وحول
مالي حب إلاَّكي
ومالي قبر برَّاكي
ومالي عـــــون
سوي إني ألف الكون
وارجع تاني لعيونك
أغني لك وأشكي لك
ويوم عيني تشوف نيلك
جراحي كــلــَّها بتهــون
***

ياسلام جميلة جدا
وشكرا لنقلك هذه القصيدة