ملك الغابه الأسد مادو .

...............

.. كان يا مكان يا سعد يا إكرام ما يحلى الكلام الا بذكر النبى عليه الصلاه والسلام .
.
..كان فى غابه جميله مليانه شجر و وزهور ونهر فى آخره شلال عالى جميل .

الغابه دى كان فيها الحيوانات كلها بتحب بعضها .

..الأسد ملك الغابه العجوز كان بيعطف على الحيوانات الضعيفه .وكان الكل دايما بيساعدوا بعض .

..الفيل والزرافه والحمار الوحشى ولما كان التعلب المكار بيعمل حاجه وحشه :

..كان الأسد بيزعقله ومش يخليه يعمل كده تانى .

..وكان دايما الاسد العجوز بيحافظ على الغابه .

..والاسد ده كان عنده ( أسد صغنون ) أسمه مادو .

..الاسد الصغنون مادو ده كان ضعيف ومش بيعرف يعمل حاجه خالص .

..وكان دايما أبوه الأسد الكبير بيحاول يخليه قوى .

..بس مادو يا عينى ضعيف وصغنون ومش بيعرف حتى يعمل صوت زئير الأسد .

..مادو علشان كان ضعيف لسه مطلعلوش شعر فى راسه .

..كان دايما الحيوانات تتكلم وتقول ازاى ده هايكون ملك علينا من غير التاج .

فين شعر راسه ..

... كان فى غابه تانيه .. فيها أسد شرير وحيوانات شريره مش بتحب الخير .

..كانت عاوزه النهر لنفسها .. علشان تشرب منه هيا وبس ..
.
فكر الاسد الشرير ده انه يهجم على الغابه الطيبه .

..وفعلا جمع الحيوانات اللى معاه فى الغابه الشريره .. وقرروا انهم يهجموا على الغابه الطيبه ..

..وفعلا هجموا عليها و وحصلت معركه كبيره إنتصر فيها الاسد الشرير على ملك الغابه الطيبه وموته .

..( يا حرام ) ... وخدوا النهر لنفسهم ومبقوش يخلوهم يشربوا معاهم منه ...

مادو كان الوقت ده مستخبى عند فرس النهر ..( السيد قشطه ) .

..السيد قشطه كبير وعملاق محدش قدر يطرده من النهر . وكمان معجبوش اللى حصل .

..أخد مادو عنده ورباه وكبره وعلمه ازاى يصطاد وازاى يعتمد على نفسه وازاى يكون أسد قوى .

..بس ياخساره لسه مادو مش طلعله شعر فى راسه .. لسه مفيش تاج ...

..سيد قشطه قاله بقولك ايه يا مادو مينفعش اللى حصل ده .

..انت لازم تنتقم للى حصل لابوك الاسد ملك الغابه .

..وكمان لازم ترجع الغابه ليك وللحيوانات اصحابنا ..

..مادو قاله طيب ازاى وانا مش عندى تاج على راسى .

..قاله انا هاوصفلك ساحر فى مغاره فى الجبل ..روح له يمكن يساعدك .

..راح مادو فى المغاره فى الجبل ودخل على الساحر القرد ( فيرو ) .

.. حكى مادو لفيرو الساحر كل الحكايه من أولها ..وقاله انا لازم يطلعلى شعر فى راسى .

..علشان أقدر اكون ملك الغابه واروح احارب الاسد الشرير ..

..قعد القرد فيرو قدام النار وفضل يقول كلام مش مفهوم . وفى الاخر عمل خلطه سحريه لمادو ..

..وقال لمادو الخلطه دى تدهن بيها راسك .

..وعلشان تعمل مفعول لازم تطلع فوق أعلى قمه فىالجبل وتعمل صوت زئير الأسد .

..بس بشرط ان الشجر اللى فى الغابه كله يتهز جامد ..

..طلع مادو فوق الجبل فى صعوبه جدااا .. والحمد لله وصل أخيرا .

..ودهن راسه بالخلطه السحريه .. وفضل يزأر يزأر يزأر ومفيش ولا شجره اتحركت .

..قال اجرب تانى وجرب مادو تانى وتالت ورابع وكتييييييير لغايه ما الشمس بدأت تغرب .

..ومفيش ولا شجره إتحركت من مكانها ...

[فضل يعيط ويقول خلاص مش هاعرف مش هاينفع اعمل اى حاجه انا ضعيف .

..انا هانزل تانى واروح اعيش مع سيد قشطه تانى وخلاص .

..ولسه مادو نازل سمع صوت عصفوره صغنووووووووونه خالص بتبكى ومكسوره الجناح بتدور على مامتها .

..وقف يشوف هيا هاتعمل ايه .. لقاها بتتحرك بالراحه وغصب عنها وبتصوصو بصوت عاااالى .

..وتصوصو تانى ومن غير تعب فضلت تجرب وتنادى على مامتها .

..لغايه ما سمع من بعييييييييييييييد صوت عصفوره جايه بتنادى على بنتها .

..وقربت منها وشالتها بمنقارها وأخدتها وطارت بيها على عشها ...

..قعد مادو يقول لنفسه ... بقى يعنى العصفوره الصغنونه دى الغلابنه تقدر تسمع ماماتها من بعيد وانا لا .

..بقى هيا اقوى منى يعنى .. لا انا مش هايأس ولا هاتعب .. انا هاجرب تانى .

..وقام من تانى مادو وأخد نفس كبيييييييييييير اوى .

..وزأر بصوت عاااااااااااااااااااااااالى جدااااااااااااااااااااااا .. بعدين ملقاش حاجه ولا شجره تانى إتحركت .

..وفجأه لقى الشجر اللى فى الغابه كله بيتهز جااامد والطيور كلها طارت فى الجو خايفه من الصوت ...

..فرح اوى مادو وفضل يتنطط ويزأر ولقى شعر فى راسه بيطلع كتير وبقى عنده تاج ..الملك .
..
نزل مادو بسرعه يفرح سيد قشطه لقى ان الحيوانات الطيبه كلها متجمعه فرحانه .

..وراح الفيل شاله ورفعه فوق ضهره . وبصوت عالى قال مادو : ...

..انا ملك الغابه الجديد انا اللى هارجع الغابه لينا من تانى وطبعا مش لوحدى بمساعدتكم يا أصحابى ...

وراح الملك مادو للأسد الشرير .. وحاربه وإنتصر عليه .

ورجعت الغابه لأصحابها من تانى ورجع النهر من تانى للحيوانات الطيبه .





..

..

مشكووووووووووووورة القصة ممتاذة تسلم ايدك