التعلب و الديب

من طرف **سارة** الثلاثاء 06 يناير 2009, 12:29 pm

............

كان زمان تعلب من التعالب والصيادين بيجروا وراه .

وديب من الديابة ان كان على الطمع طماع .

وانتم عارفين الطماع ياكل ماياكل مايشبعشى

يشرب ما يشرب مايشبعشى يلم يكوم ماهو طماع طماع

تعلب التعالب يجرى يجروا الصيادين وراه

التعلب فين التعلب فين التعلب جوه الشجرة يجروا وراه الصيادين .

الحطابين التعلب فين التعلب فين مستخبى فى الجحر البعيد

يوم من ذات الايام صياد من الصيادين بشويش قرب منه

وبشويش بشويش حط ايده عليه وبالقوى بالقوى مسكه من ديله

وحط ايده على راسه وشاله هيله بيله لاكن التعلب تقيل

عمو الصياد يقول هاربطه من اديه و رجليه فى الشجرة

وراح يجرى على البلد سكة البلد بعيد

عمو الصياد طالع يجرى رايح يلم البلد فرحان عمال يقول :

انا اصطدت التعلب وتعلب التعالب مربوط ومكتف فى الشجرة

ابو الديابة الطماع جاى ماشى وانتم عارفين الطماع

ياكل ماياكل مايشبعشى يشرب مايشرب مايشبعشى

يقول الله ايه ده ؟

مربوط ليه ياتعلب فى الشجرة ؟

التعلب عارف انى الديب طماع يضحك على الديب ويقوله :

ابدا ابدا اصل الصيادين بيحبونى كل كل مايشفونى ياكلونى .

حمام وبط ووز ويشربونى اللبن ولو ما اكلتش يضربونى ويكتفونى .

طماع الديب الديب طماع قال لا مش معقول ؟ ده كلام ولا فى الحواديت .

ده مش معقول التعلب يقوله :

ان كنت مش مصدقنى خليك قاعد مستنى تشوف اهل البلد جايبين لى الاكل

الديب طماع يقول :

تعلب يابن عمى قرايب احنا يصعب علي يضربوك علشان تاكل يصعب علي اسمع :

احوش الحبل من رجليك تحطه انت فى رجليه

افك الحبل من ايديك تحطه انت فى ايديه

افك رقابتك تربط انت رقبتى تمشى انت واتكتف انا فى الشجرة

حتى لو جابولى بقرة هاكولها علشان خاطرك حتى لو ماقدرتش

يضربونى بدالك ما انت ابن عمى يا تعلب علشان خاطرك هاستحمل .

طماع الديب يفك ايدين التعلب ويقول للتعلب كتفنى ياتعلب كتفنى .

التعلب يربطه فى الشجرة ويحط ديله فى سنانه و يقول يافكيك .

والديب طماع مربوط فى الشجرة يضحك ويقول :

وضحكت عليه وضحكت عليه هايجيبولى الاكل وهاكل والديب فرحان .

والحطابين والصيادين جايين يصرخ الديب ويقول لهم :

بس بس ما تضربونيش حمام هاكل بط هاكل كله كله هاكل

والفلاحين يضربوا و الصيادين يضربوا .

و الديب الطماع يصرخ وينط يقطع الحبل يمسكوه من ديله يشدوا

وهو يشد ينقطع ديله يجرى بلد تحطه وبلد تشيله

وفى كل بلد يقول :

الله هما ضربونى ليه هما جابولى الاكل وما اكلتش ؟

هما قطعوا ديلى ليه هما جابولى الشرب وماشربتش ؟

لسة الديب مستغرب ولسة الطماع ماشى ماشى من غير ديل .

ديب من الديابة وكان زمااااااااااااااااااااااان

وتوتة توتة خلصت الحدوتة

............
.

من طرف **sayed swilam** الثلاثاء 13 يناير 2009, 4:45 am

الديا بة دلوقتى كتير

اللهم ارحم شهداء غزة

من طرف **mezo2010** الخميس 22 يناير 2009, 2:01 pm

مين يتعلم بقى

التعلب و الديب

التعلب و الديب

رد: التعلب و الديب

رد: التعلب و الديب