: حوار مع حمار موضوع جامد بس|||||||||||

فتحت قناة اللسان الفضائية التابعة لدولة زهرستان
وجدت برنامجا غريبا جدا
مقدمة البرنامج امرأة عبارة عن آية من آيات الحسن والجمال والأناقة
الجمهور الحاضر عبارة عن مثال حى للانسان المحترم
ولكن ما لفت نظرى فى البرنامج هو شخصية الضيف
لم يكن الضيف انسانا
وانما كان حمارا
كانت مقدمة البرنامج تسأل الحمار ، ثم تنظر الى صاحبه ليترجم لها ما قاله الحمار فى نهيقه
ونظرا لان البرنامج كان غريبا جدا فقد سجلته بالصوت والصورة
وحتى لا أطيل عليكم
فهذا هو مضمون الحوار كما دار حرفيا بين مقدمة البرنامج والحوار
-- نتعرف عليك لو سمحت
= انا حمار ولدت حمارا واعيش حمارا واموت حمارا
-- جنسيتك لو سمحت
= انا من زهرستان
-- حالتك الاجتماعية لو سمحت
= انا مش متجوز
-- ليه ؟
= اتجوز ازاى وانا معيش فلوس
-- طب ليه متشتغلش ؟
= وهو انا لاقى شغل ومشتغلتش !!
-- مش لازم تشتغل فى الحكومة ، تقدر تعمل مشروع صغير تاكل منه عيش
= مشروع صغير ؟؟ المشروع اللى بتقولى عليه حضرتك هيكلفنى كتير وكتير ويمكن اتحبس بسببو
-- ازاى ؟
= المشروع دا عايز اكتر من 1000 موافقة وموافقة ، ولازم استلف ولازم ياخدوا ضمانات ، وبعدين لو اراد الله وتم فتح المشروع هتيجى التامينات الاجتماعية وتطالبنى بفلوس ، وهتيجى الضرائب وتطالبنى بفلوس ، وتيجى فواتير الكهرباء زى النار ، وتيجى وتيجى وتيجى ، وفى الاخر هلاقى نفسى مديون ومش قادر اسدد اللى عليا ويمكن ساعتها اتحبس
-- طب استلف من اخواتك وقرايبك
= اخواتى وقرايبى عاطلين ومبيشتغلوش
-- ليه ؟
= فى الحقيقة همة كانوا بيشتغلوا فى شركات كبيرة جدا وبيكسبوا كتير جدا
-- وبعدين ايه اللى حصل ؟
= اللى حصل ان الشركات دى اتخصخصت ، والمشترى قرر انهاء خدة اكثر من 95 % من العاملين واخواتى وقرايبى كانوا من ضمن الناس اللى انتهت خدمتهم
-- طب ليه متحاولش تشتغل فى اى شركة او مكان تانى ؟
= شوفى يا مدام 00 عشان اشتغل فى اى مكان يبقى لازم يكون معايا واسطة ومعرفة او ادفع فلوس كتير ، وانا معنديش لا ده ولا ده
-- أومال انت عايش ازاى ؟
= عايش فى الشارع
-- ليه 00 هو انت معندكش شقة تسكن فيها ؟
= شقة ؟؟ هجيب منين يا مدام فلوس الشقة ؟؟ عشان اشترى شقة غرفة من غير صالة فى أسوأ منطقة هدفع ألفات مؤلفة ، ولو حبيت آخد شقة ايجار برضو هدفع كل شهر مبلغ وقدره ، طب هعمل ايه يعنى وانا معيش فلوس !!!
-- بس وجودك فى الشارع كدة هيجيب لك امراض كتيرة
= دى حقيقة ، وانا فعلا عندى اكتر من مرض
-- طب ليه متروحش المستشفى عشات تتعالج ؟
= يا مدام المستشفيات مفيهاش رعاية ولا اهتمام ، مفيش دكتور بيجى فى ميعادو ، والمستشفيات مفيهاش الادوية اللازمة ولا فيها اجهزة حديثة ولا فيها اكياس دم ، يبقى هروح المستشفى ليه ؟!
-- طب ليه نائب البرلمان اللى عن الدايرة بتاعتكو مبيقولش الكلام ده فى البرلمان ؟
= يا مدام قبل الانتخابات شىء وبعد الانتخابات شىء تانى خالص ، قبل الانتخابات هتسمعى كلام حلو ووعود ، بعد الانتخابات كل الكلام اللى اتقال بيتنسى ، وكل الوعود اللى اتقالت بتروح فى الهوا
-- لو الموضوع بالشكل ده يبقى لازم ترفعو قضية عشان تاخدوا حقوقكم
= يا مدام القضاء حبالو طويلة جدا ، يعنى عشان ارفع قضية دلوقتى ، يبقى الله اعلم مين من الورثة اللى هيستلم حقوقنا
-- انت لو سافرت للعاصمة وردستان ممكن تقابل حد من المسؤلين وان شاء الله كل مشاكلكم هتتحل
= اولا 00 مش ممكن اسافر وردستان لان الشوارع كلها مليانة مطبات
ثانيا : مفيش علامات ارشادية كافية وعشان كدة الحوادث بتبقى كتير
ثالثا : الباشمهندس رادار شاطر جدا ع الغلابة ، لكن الناس اللى ليها ضهر بتلاقى الرادار يعمل له تعظيم سلام ويفتح الابواب المقفولة
-- عايزة اسألك سؤال 00 معاك بطاقة انتخابية ؟
= هعمل بيها ايه ؟؟ سواء روحت أدلى بصوتى أو مروحتش فنائب الدايرة بتاعتنا بيكسب من خمسة وتلاتين سنة وعمرى مشوفت حد غيرو كسب
-- انت بتعرف كام لغة ؟
= يا مدام انا مبعرفش اقرا ولا اكتب
-- ليه ؟ هو انت مدخلتش مدرسة ؟
= دخلت 00 بس المدرسين مكنوش بيشرحوا اى حاجة خالص عشان كل همهم الدروس الخصوصية
-- انا شايفاك نحيف جدا 00 انت عندك انيميا ؟
= فعلا انا عندى انيميا
-- انصحك تهتم بوجباتك الغذائية وتكتر من اكل اللحوم والفواكه
= يا مدام انتى باين عليكى مش عارفة المجازر اللى بتحصل في طوابير العيش ، ومش عارفة المواد المسرطنة اللى بيحقنوها للفواكه ، ومش عارفة جشع الجزارين اللى بيدبحوا الحمير اللى زيى ويبيعوها للناس على انها لحم عجالى أو ضانى
-- طب حاول تهتم بنفسك عن طريق ممارسة الرياضة
= هى فين الرياضة يا مدام ؟!! انتى عمرك شوفتى المنتخب الزهرستانى حصل على كاس العالم ؟؟ عمرك شوفتى المنتخب الزهرستانى حصل على ميداليات اوليمبية ؟؟ طب دورة الالعاب الاوليمبية شغالة حاليا في الصين ، وآدى ديلى أهو لو المنتخب زهرستان حصلت حتى ميدالية برونزية
-- بصراحة انا شايفاك تعبان جدا واعتقد انك محتاج تروح تغير جو في اى شاطىء من الشواطىء الزهرستانية
= يا مدام الشواطىء حاليا مليانة بمياه الصرف الصحى
-- بس الحياة مش سودة أوى بالصورة اللى انت متخيلها ، انت لازم تروح اقرب جامع وتصلى فيه ركعتين لله
= انتى متعرفيش يا مدام ان الجوامع بتقفل بعد أداء الصلوات فيها ؟ ومتعرفيش ان دخول الجوامع للاعتكاف فيها ممنوع في زهرستان ؟
-- بس البلد محتاجة للاقوياء عشان يحافظوا عليها من الاعتداءات الخارجية
= طب هنعمل ايه في الاتفاقات الدولية اللى زهرستان مشتركة فيها ؟
-- تقصد ايه ؟
= معظم الاتفاقات الدولية اللى زهرستان مشتركة فيها مش في صالح زهرستان ، وعشان كدة زهرستان محاصرة ومحتلة سياسيا واقتصاديا
-- بس دى اتفاقات وزهرستان متقدرش تلغيها بالارادة المنفردة
= شوفى يا مدام 00 لو زهرستان تمتلك القوة ، يبقى هتقدر تعمل كل حاجة
-- طب ازاى هتمتلك القوة ؟
= بالنووى 00 اللى يمتلك السلاح النووى مفيش حد هيكلمو ولا هيقرب ناحيتو
-- اللى يمتلك السلاح النووى مفيش حد هيكلمو ولا هيقرب ناحيتو
بهذه الكلمة سيداتى آنساتى سادتى نختتم حلقة اليوم
من قناة اللسان الفضائية الزهرستانية سعدنا بكم
ونشكركم
ونشكر الحمار على هذا الحوار
والسلام عليكم ورحمة الله وبركات

جامدة جدا وده اللى بيحصل فى معظم البلاد مش زهرستان بس
وبيحصل مع البشر مش مع اى كائن اخر
وشر البلية ما يضحك

وإيه فكرة زهرستان دى وبعين الحمار طول فى كلامه أوى يلا الله المستعان

حور جامد جدااااااااااااااااااااااااااااااا

انا مغاك كلنا نناشد الحمار
بأن يصمد ويصبر
وربنا يسهل
ويمكن يحصل نظافة للزريبة

يبقى حمار عايش حمار ومات حمار

حوار رائع جدآ مستنيين بقيت الحمير

رائع يا أبو حميد..........

ومشكور عليه يا صديقى العزيز