ميلاد المنتدي ...حوار مع المدير

من طرف **abu rabia** السبت 30 أغسطس 2008, 5:48 pm

ميلاد المنتدي ...حوار مع المدير 13400_16

في مثل هذا اليوم ...وبعد منتصف الليل ...وبعد ان دقة الساعة الواحدة ليلا ...وفي هدوء

يغلفه الصمت ...كان المخاض ... وكان الميلاد ...ميلاد منتدانا ...

ظلام يغلف حجرة الاستاذ محمد فوزي ...فقط ذلك النور الذي ينبعث من شاشة جهاز الكمبيوتر

.... لحظات طويلة مرت وهو علي هذا الحال ...يعمل في صمت وفي هدوء ...ينتظر اللحظة

المرتقبة ... ضغط علي زر enter في لوحة المفاتيح التي أمامه ...وأسند رأسه بيده ...

ومرة لحظات وهو ينتظر .... وقلق عجيب ينتابه من ان تكلل جهوده بالفشل ...ام أن يرفض طلبه

... نظرات يملؤها الأمل ... يغلفها شك وانتظار .......ثم فتحت الصفحة علي شبكة الانترنت ..

لتحمل له الفرحة .....والفخر .......والسعادة ..... ها هو وليده قد جاء ... ها هو اسم دملو يظهر

أمام عينيه ... وها هو المنتدي الذي حلم به ... يولد من رحم الانترنت ....

إنها اللحظة التي انتظرها قد جاءت ... وأصبح الحلم حقيقة ... وأصبح لقريته دملو ... منتدي يحمل اسمها

منتدي قرية دملـــــــــــــــــــــــــــــــــــــــــــــــو

كانت بالطبع هذه مقدمة لابد منها ... لتسبق الحوار الذي تم مع مدير المنتدي ... وصاحب الفكرة ... ومنفذها الأول

الاستاذ محمد فوزي حسين او كما نعرفه جميعا باسم admin .... والذي ننشره اليوم احتفالا بعيد ميلاد المنتدي

وبداية أحب أن أوضح أن الفكرة - فكرة ان يحمل المنتدي اسم دملو- كانت وكما قال الاستاذ محمد فكرة المهندس حاتم أبو العزم

ولن أطيل أكثر من ذلك ..... ولندع الاستاذ محمد بنفسه يحدثنا عن المنتدي وتطور فكرته ومحاولاته لتنفيذها حتي تمت

ميلاد المنتدي ...حوار مع المدير 16051511

من سنتين تقريبا وانا كنت بحلم امتى اليوم الى يدخل فيه البلد DSL

لان كنت بدخل من تليفون البيت وبنسى نفسى وطبعا بابا كان بيقول منى جاى

لغايه ما قرر ان انا الى ادفع فاتوره النت المهم بعد ما وصل الDSL

والحمد لله

كان كل همى انى اعمل موقع مش مهم موقع فى ايه او عن ايه المهم انى اعمل موقع

طبعا اعدت اقرى كتير واحمل برامج واجرب كتيييييييييييييييييييير

لغايه ماعملت اول موقع تجريبى واسمه كان learn.orgfree.com

طبعا محتواه اتغير اكتر من مره

وفضلت فى الموضوع ده يجى سنه اصمم مواقع وانشرها كان اكبر مشكله بتقابلنى

مواقع الاستضافه لانى طبعا كنت شغال على المواقع المجانيه وطبعا ماكنتشى بتدينى كل الى انا عاوزه

المهم حاتم كان فى الوقت ده عمل الموقع اللي هو عمله باسم البلد

وانا ساعدته فيه وان كان موقع بسييط جدا ومش محتاج اى حد فاهم اى حاجه علشان يعمله بس اهى كانت تجربه

وبعد كده اتنقله لمرحله المنتديات

واسمحوا لي اقولكم المنتدي بيتعمل ازاي

الطريقه السلييمه انك بتحجز مساحه فى اى شركه استضافه وكمان بيتحجز دومين نيم

وكمان بتجيب برنامج المنتدى"السورس" لان المنتديات عباره عن برنامج مكتوب بلغه البى اتش بى

وطبعا لازم الاستضافة تكون لها مواصفات معينه علشان المنتدى يركب عليها

علشان كده انا جربت يمكن اكتر من 50 شركه استضافه

وكمان جربت تقريبا كل انواع المنتديات المجانيه منها والغير

ولكن للاسف كنت كل ما أعمل منتدى واول ما يبدأ يشتغل ما فيش أسبوع وكان نظام المنتدى بيسقط طبعا بسب الاستضافات المجانية

المهم تنتى على النظام ده كتير وانا بدور فى المنتديات

لغايه مالقيت شركه زى احلى منتدى كده بتديلك منتدى مجانى مقابل اعلانتهم وبدون اى مجهود فى ثوانى بعد التسجيل يكون عندك منتدى

وفعلا عملت منتدى على الشركه ديه واشتغل لمده شهر تقريبا وكان باسم دملو

وعلى فكره كان وصل الاعضاء فيه فى الفتره ديه ل20 عضو

طبعا ماخبيش عليك انا ماكنتش اعتقد ان لو عملت منتدى لدملو بس هايكون فيه اعضاء ومشاركات زى دلوقى

علشان كده كنت مخلى المنتدى عام اه كان اسمه منتدى دملو بيس هو كان باب واحد فيه هو الى بيتكلم عن دملو

وطبعا ماقدرش اوصفلك سعادتى لما كان فيه واحد بيسجل فى المنتدى ده

وكنت كل يوم اصحى من النوم اول حاجه اعملها اشوف فيه حد سجل جديد ولا لسه

على فكره المنتدى ده كان المحاسب محمد عبد الرشيد سجل فيه

المهم كانت الدراسه دخلت فى الفتره ديه وطبعا انت عارف ظروف دراستى كانت عامله ازاى وكان فيه قرار ادارى بشيل الجهاز فى الدراسه

للاسف اهملت المنتدى ده لغايه مانحذف ورجعت تانى فى الاجازه

بس المره ديه كنت داخل على النت جاهز عندى المعلومات الكافيه انى اعمل اى حاجه موقع منتدى او لى من هذا القبيل

طبعا اختصرت الطريق ودورت على الشركات الى تدينى منتدى مجانى جاهز لانها كانت الافضل فى كل التجارب الى عملتها قبل كده

جربت برده حوالى 5 شركات لغايه ماوصل لشركه احلى منتدى

وعملت المنتدى والحمد لله

انتهي الجزء الأول من الحوار ويليه الجزء الثاني ان شاء الله

من طرف **sameh ahmed** الأحد 31 أغسطس 2008, 11:41 am

كل عام وأنتم جميعاً ومنتدانا وبلدنا بخير
وأعتقد أن هذا الحوار الشيق
الذى نشر منه الجزء الأول
يعد أولى خطوات الاحتفال بالمنتدى الرائع
وفى هذه اللحظات الرائعة
لا يسعنا إلا أن نتقدم بالشكر
لكل من ساهم فى صنع أو إستمرار هذا المنتدى
الذى يحمل أسم قريتنا الجميلة
وشكر خاص للأباء الحقيقيين لهذا المنتدى
أ/ محمد فوزى حسين
أ/ حاتم أبو العزم
وبالطبع
أ/ أحمد دسوقى
أ/ محمد محمود ربيع

ونتوجه جميعاً أعضاء ومشرفين بالشكر الجزيل لهم
على حسن صنيعهم
وكل عام وأنتم بخير

وننتظر باقى الحوار

وحوارات مع باقى الأباء

ومن الممكن كلمة من كل الأعضاء

من طرف **abu rabia** الأحد 31 أغسطس 2008, 3:14 pm

ويستمر الحوار مع المدير واليكم الجزء الثاني من الحوار

سؤال :- .............................
المدير :- طبعا فكره المنتدى انها تكون لدملو فقط ديه بتاعة المهندس حاتم

سؤال :- ..............................
المدير :- لا طبعا كنا لسه فى فتره التجارب

سؤال :- ...........................
المدير :- فعلا كنا علي اتصال منذ بداية الفكرة الي ان تم التنفيذ

سؤال :- .............................
المدير :- نعم بالفعل ...كانت لحظة ميلاد المنتدي الحالي هي الساعة الواحدة بعد منتصف الليل
يوم 31 أغسطس 2007

سؤال :- .................................
المدير :- اول حاجة عملتها بعد فتح المنتدي إني قمت نمت ...فقد كانت سهرة طويلة وأحسست أني أنجزت
بس للأمانة كنت بحلم ببكرة وبالمنتدي

سؤال :- .....................................

المدير :- من غير اي استغراب بس فعلا ماكنش فارق معايا قوي ..لأني كنت مصر .. وكنت هحاول
مرة تانية وتالتة ورابعة وما تنساش اني عملت قبل كده يجى 15 منتدى

سؤال :- ............................

المدير :- بالضبط ...أنا فعلا ما كنتش متوقع النجاح والاستمرار والانتشار اللي اتحقق بعد كده

سؤال :- ....................................
المدير :- طبعا أول حد سجل في المنتدي كنت أنا

سؤال :- .............................

المدير :- اول حاجة عملتها بعد ما سجلت هو اني قعدت املاه مواضيع واكتب فيه بحيث يكون فيه محتوي

سؤال :- ..............................
المدير :- وبعد كده كان لازم اعمل اعلانات عنه واحاول اخليه ينتشر رحت اعمل اعلانات فى المنتديات التانيه
و عملت اعلان فى منتدى كان تقريبا دى فى دى...وتانى يوم لاقيت واحد من العضاء مسكنى تهذىء
ليه علشان المنتدى مفيهوش غير عضو واحد بس هو الادمين

سؤال :- ........................
المدير :- أيوة انا عارف طبعا ان الكلام ده للنشر وانا باتكلم براحتي علشان انا وسط اخواتي ةمش هتكسف منهم

سؤال :- ......
المدير :- اوكيه هكمل ..........تاني يوم قمت مسجل يوزر نيم تاني باسم bluechem ونزلت بيه
شوية مواضيع

سؤال :- ......................
المدير :- بصراحة مش فاكر اول موضوع كتبته لان كل همي اني اكتب مواضيع كتيرة وبس

سؤال :- ............................

المدير :- حكاية اول عضو سجل دي غريبة شوية هاحكيهالك ....طبعا بماان المنتدى باسم دملو كان لازم اعمله اعلانات فى دملو...وطبعا كان اول واحد قريب منى وليه فى النت ممكن اكلمه على المنتدى ..هو
صديقي أحمد حمودة وماقولكشى ....خدت منه تهزيء وكلام من نوعية ايه بقي ...ياعم روح شوف
مدرستك الاول....اهو ده الى انت شاطر فيه ....وحاجات من دي كتير ...وفى الاخر سجل بس علشان يرضينى

سؤال :- ........................
المدير :- حاتم كان في الوقت ده مسافر زي ما قلت لك ... وانت عارف بقي انه طول عمره دماغه كبيرة
لما بلغته قالي تمام ...سجلي بقي .. وابعت لي ... تخيل يا محمد انا اللي سجلت له اول مرة ...يعني ما
كلفي خاطره حتي في الاول وسجل نفسه .... بس لما دخل المنتدي عجبه وشجعني قوي

سؤال :- ...............................
المدير :- الموضوع طبعا كان في نهاية الاجازة وكان لازم حد يساعد في ادارة المنتدي ..ولازم يكون شخص
مميز وله طبيعة خاصة ... ومقتنع بالفكرة .. وطبيعي جدا ان الشخص ده يكون الباشمهندس حاتم نفسه
وماتنساش ان هو صاحب فكرة ان المنتدي يكون باسم دملو ومختص بابناء دملو .....وبدا الدراسة بعدها
واتشال الكمبيوتر وفضلت اتابع علي فترات ... وكل يوم كان احساسي بالنجاح بيزيد لدرجة اكبر مما
كنت متوقع

سؤال :-.............................

المدير :- ماكنشى فيه لحظه معينه عرفت فيها ان المنتدي ده نجح وانه هيستمر وانه غير المنتدي السابق
بس كل يوم وانا بتأكد ان المنتدى ده مكتوبله الاستمرار ان شاء الله

سؤال :- ................................

المدير :- ما فيش عضو بعينه فرحت بانضمامه اكتر من الاخرين ..لأن بصراحة كل واحد لغايه دلوقى بيسجل فى المنتدى انا بفرح جدا.....لكن بصراحة كان اول واحد حسيت انه ضروري للمنتدي هو حاتم

سؤال :- ................................
المدير :-فعلا الشكل الحالي وما وصل اليه المنتدي يفوق ما حلمت به الى حد كبير بس انا بصراحه كنت
وما زلت أتمني انه يكون من نوع المنتديات الفيبى الغير مجانيه ده بالنسبه لللتقنيه
اما بالنسبه للمحتوى ده فعلا فوق ماكنت اتصور

سؤال :- ...........................

المدير :- كانت أكثر لحظة حسيت فيها ان المنتدي له تأثير وثقل علي أرض الواقع هي في الحفلة الخاصة
بالمولد النبوي الشريف

سؤال :- ............................

المدير :- بخصوص الانطباعات عن المنتدي فالنقطة دي فيها تباين كبير فيه اللي فرحان وشايف انها فكرة
جيدة وتحرك جميل من شباب البلد وفيه اللي شايف ان المنتدي ساعات بيدي مساحة للنقد بلا داعي زي مثلا
مجلس ادارة مركز الشباب بس علي العموم الانطباعات اللي عند الناس عن المنتدي جيدة جدا

سؤال :- .........................
المدير :- لا تتخيل مدي تفائلي بالمنتدي وبأعضائه ولكن كل ما أتمناه أن تقل حدة انفعالات البعض أثناء
المناقشات وبالطبع الدافع لذلك هو الحماس وأعتقد أنه حماس يجب أن يوجه

سؤال :- .................................
لم يرد عليه المدير نظرا لإنشغاله ووعد باستكمال الحوار الذي طال في جزء ثالث ان شاء الله

من طرف **mar** الأحد 31 أغسطس 2008, 5:48 pm

حوار شيق
وجميل منتظرين الجزء الثالث

من طرف **سميرالسيد** الأحد 31 أغسطس 2008, 9:18 pm

كل عام وانتم بخير
ربنا يوفقكم جميعا الى كل خير
حوار جميل

ميلاد المنتدي ...حوار مع المدير

ميلاد المنتدي ...حوار مع المدير

رد: ميلاد المنتدي ...حوار مع المدير

رد: ميلاد المنتدي ...حوار مع المدير

رد: ميلاد المنتدي ...حوار مع المدير

رد: ميلاد المنتدي ...حوار مع المدير