التعلب المكار و السلحفة المسكينة

من طرف **سارة** الجمعة 02 يناير 2009, 1:49 am

..........

كان ياما كان ياسعد ياكرام ولا يحلى الكلام الا بذكر النبى عليه الصلاة والسلام

كان فيه تعلب مكار و سلحفة مسكينة

التعلب المكار ابو الافكار كان محتار ليل ونهار مش قادر ياكل السلحفة ويدوق لحمها

وكل مايشوفها ماشية وهى شايلة بيتها على ظهرها يكلم نفسه ويقول :

ااااااااااه انا نفسى فيها وامتى امتى بقى اتغدى بيها ؟

والتعلب كل مايزحف ويقرب من السلحفة يبص ويلاقيها بكل قوتها دخلت وقعدت فى بيتها

يدور ويلف حواليها مش قادر يوصل ليها ويتغدى بيها

وروحى ياايام وتعالى ياايام وفى يوم من ذات الايام

بص شاف الصقر نزل على الارض وشال حجر بمنقاره وطار فى الهواء ورمى الحجر على تحت ناحية الارض نزل الحجر على بيضة

كبيرة من بيض النعامة وبسرعة قوام نزل الصقر على البيضة اللى انكسرت قشرتها واكلها فى ساعتها

والتعلب فى الحال قال انا هاعمل زى الصقر

ومن فوق الصخرة العالية ارمى الحجر على بيت السلحفة اللى فوق ظهرها البيت هايتكسر زى البيض اللى بيتقشر

واتغدى بالسلحفة وادوق لحمها بعد ما اهد بيتها اللى فوق ظهرها يسلالالالالالالام دى فكرة لاكن تمام

وفى الحال نط التعلب المكار ووقف على صخرة كبيرة عالية بتطل على الطريق اللى بتمشى فيه السلحفة وهى رايحة وهى جاية

واستناها وقلبه قايد نار وبالقرب منه حجر من الاحجار

وفين وفين يمكن بعد اكتر من ساعتين لما شاف السلحفة من بعيد جاية ماشية على مهلها

اول مابقت جنب الصخرة الكبيرة العالية رمى الحجر على ظهرها لاكن الحجر نزل على بيتها انكسر الحجر وبقى فتافيت

وبيتها زى ما هو اجمد بيت

والتعلب احتار وتاه فى دوامة من الافكار

ولما اخته التعلبة عرفت حكايته قالت له :

روح اسال امينة المكتبة علشان تعرف كل شيئ عن السلحفة هاتقدر تاكلها وتدوق لحمها بالعلم والمعرفة

والتعلب سمع كلام اخته التعلبة

ولما قابل امينة مكتبة التعالب قالها :

انا عايز اعرف بعض المعلومات عن حياة السلحفة هى بتحب تاكل ايه وتشرب ايه وبتحب تنام امتى وفين

وامينة المكتبة قعدت قدام الكمبيوتر بتاعها وداست على زرار التشغيل بصباعها وقالت :

عايزين نعرف بعض المعلومات عن السلحفة

وقوام وفى الحال اتكلم الكمبيوتر وقال:

السلحفة حيوان بر مائى

يعنى حيوان يعيش فى البر وفى الميه وبتمشى على مهلها وهى شايلة بيتها على ظهرها وفى وقت الخطر :

بتخبى راسها ورجليها وديلها جوة بيتها

و التعلب زعق وقال :

انا عايز اعرف هى السلحفة بتحب تاكل ايه وبتحب تشرب ايه وبتنام امتى وفين ؟

والتعلبة امينة المكتبة داست على زر من ازرار الكمبيوتر وقالت:

هى السلحفة بتحب تاكل ايه ؟ ؟

اتكلم الكمبيوتر وقال :

السلحفة بتحب تاكل الاعشاب وبتحب الجزر والخيار

لاكن هى بتحب قوى تاكل الفراولة اكتر من اى حاجة تانية لدرجة انها تنسى نفسها وتاكل منها لحد ماتملى بطنها

وماتقدرشى تدخل بيتها وتخبى جسمها

حلوين

وعند المعلومة دية قوام وفى الحال التعلب المكار قال :

هى المعلومة دى اللى كنت عايزها

ما احنا عارفين التعلب المكار مش ممكن يسيب اى فرصة مايستفدشى منها ما هو تعلب بقى

هى المعلومة دية اللى انا محتجلها علشان ااكل السلحفة

وبعد كدة ادوق لحمها وطعمها

و التعلب المكار قعد طول النهار يجمع الفراولة من كل الاشجار ويحطها فى طريق السلحفة

فرحت السلحفة بالفراولة ومشيت تاكلها على مهلها لحد ماتنفخت بطنها

ولما شافت التعلب بيقرب منها ما قدرتشى ياعينى تدخل بيتها وتخبى جسمها

وتوتة توتة التعلب المكار بالعلم والمعرفة انتصر على السلحفة

حلوين نفهم ايه من الحدوتة دية ؟ ؟ ؟

انا مستنية تقولولى

.........

من طرف **الشيخ محمود** السبت 03 يناير 2009, 8:44 pm

مش عارف اه اخر التعلب المكار
ضحك عليبنا
واكل السلحفاه بس مش بلخدعه لكن بالمدفع

التعلب المكار و السلحفة المسكينة

التعلب المكار و السلحفة المسكينة

رد: التعلب المكار و السلحفة المسكينة